అందరికీ వరద సాయం అందించాలని డిమాండ్
బూర్గంపహాడ్, వెలుగు: వరదలతో నష్టపోయిన వాళ్లను వదిలేసి లీడర్లకు అనుకూలమైనవాళ్ల పేర్లను సాయం అందజేసేందుకు రాసుకుంటున్నారని వరద బాధితులు ఆందోళనకు దిగారు. భద్రాద్రి కొత్తగూడెం జిల్లా బూర్గం పహాడ్మండలంలో బుధవారం రెండుచోట్ల రాస్తారోకో చేపట్టారు. మండలకేంద్రంలోని గౌతంపురం కాలనీవాసులు బూర్గంపహాడ్–కొత్తగూడెం రోడ్డుపై, నాగినేనిప్రోలు రెడ్డిపాలెం వాసులు స్థానిక రోడ్డుపై బైఠాయించారు. నష్టపరిహారం పంపిణీ కోసం తమ గ్రామాల్లో తయారుచేస్తున్న జాబితా తప్పులతడకగా ఉందని మండిపడ్డారు. టీఆర్ఎస్ లీడర్లు, ఆఫీసర్లు కుమ్మక్కై వరదలో మునిగిన ఇండ్లను వదిలేసి, వరద వల్ల నష్టపోనివాళ్ల పేర్లు చేరుస్తున్నారని వారు ఆరోపించారు. వరద బాధితులకు నిత్యావసర వస్తువులు అందించడంలోనూ వివక్ష చూపుతున్నారని ఆవేదన వ్యక్తం చేశారు. అందరికీ సాయం అందజేయాలని డిమాండ్ చేశారు. సుమారు మూడుగంటల పాటు రాస్తారోకో చేయడంతో ట్రాఫిక్ కు అంతరాయం ఏర్పడింది. ఉన్నతాధికారులు స్పందించి తమకు న్యాయం చేసేవరకు ఆందోళన విరమించేదిలేదని బాధితులు తేల్చిచెప్పారు. తహసీల్దార్ భగవాన్ రెడ్డి అక్కడికి చేరుకొని అందరికీ న్యాయం చేస్తామని హామీ ఇవ్వడంతో రాస్తారోకో విరమించారు.
