హైదరాబాద్, వెలుగు: జీహెచ్ఎంసీకి చెందిన ఖరీదైన భవనాలను ఖాళీగా ఉంచుతున్నారు. అప్పుల్లో కూరుకుపోతున్న బల్దియా ఆదాయాన్ని పెంచే మార్గాలపై దృష్టి పెట్టాల్సి ఉండగా.. ఆ పని మాత్రం చేయడం లేదు. గ్రేటర్ పరిధిలోని ఆరు జోన్లలో జీహెచ్ఎంసీకి దాదాపు లక్ష కోట్ల విలువ చేసే ఆస్తులున్నాయి. వీటి మెయింటెనెన్స్, పరిరక్షణతో పాటు అద్దె వసూలు చేయాల్సిన బాధ్యత ఎస్టేట్ విభాగం అధికారులపైనే ఉంది. వారు పట్టించుకోకపోవడంతో బల్దియా ఆదాయాన్ని కోల్పోతోంది. గ్రేటర్లో మొత్తం జీహెచ్ఎంసీకి 22 కమర్షియల్ బిల్డింగ్స్, 16 మార్కెట్లు, బిల్డింగ్స్లో 3 వేల స్టాల్స్ ఉన్నాయి. కొన్నింటిలో జీహెచ్ఎంసీ ఆఫీసులు కొనసాగుతుండగా.. మిగతా వాటిని లీజుకు అప్పగించింది.
చాలా భవనాలకు 20 ఏళ్ల కిందట లీజుకు ఇచ్చిన అద్దె రేట్లనే కొనసాగిస్తున్నారు. కొత్తగా టెండర్లు వేసి వేలం పాట ద్వారా ఇవ్వాల్సిన ఆస్తులను పాత రేట్లతోనే కొనసాగిస్తుండటంతో ఏడాదికి దాదాపు రూ.50 కోట్లు నష్టపోతోంది. గ్రేటర్లో ఖైరతాబాద్, సికింద్రాబాద్, చార్మినార్, ఎల్బీనగర్, శేరిలింగంపల్లి, కూకట్ పల్లి ఇలా ఆరు జోన్లు ఉండగా..ఎక్కువగా 3 జోన్లలలోనే బల్దియా ఆస్తులున్నాయి. అబిడ్స్ కాంప్లెక్స్లో షాప్లను 1994లో అలాట్ చేయగా, 1997లో లీజు ముగిసినా అధికారులు అదే రేటుకు తిరిగి వారికే అప్పగించారు. కోఠి బస్ డిపోలో లీజు 2013 లోనే ముగిసినా పాత కిరాయితోనే ఇప్పటికీ కొనసాగిస్తున్నారు.
కొత్తగా టెండర్లు వేస్తే..
చార్మినార్ జోన్లోని మలక్పేట జీహెచ్ఎంసీ కాంప్లెక్స్లో కేవలం ఒక్క షాపు నుంచి నెలకు లక్షకుపైగా అద్దె వస్తోంది. ఇక్కడ కొత్త రేట్లతో టెండర్లు వేయడంతోనే ఇంత మొత్తం వస్తుంది. మలక్ పేట తరహాలో మిగతా వాటికి కొత్తగా టెండర్లు వేస్తే ప్రస్తుతం వస్తున్న రెంట్కు ఐదారు రేట్లు ఎక్కువగా వచ్చే అవకాశం ఉంటుందని పలువురు అధికారులు చెప్తున్నారు.
సికింద్రాబాద్ జోన్ - హరిహర కళాభవన్లో
షాపులు ఒక్కోదానికి రెంట్ (నెలకు)
ఎస్పీ రోడ్ వైపు 13 రూ.4,200 నుంచి రూ.13,125
ఆర్పీ రోడ్ వైపు 4 రూ. 12 వేల నుంచి రూ.68 వేలు
అలెగ్జాండర్ రోడ్ వైపు 6 రూ.6,163
1,3,4 ఫ్లోర్లలో - పవర్ గ్రిడ్ రూ. 3 లక్షల 75 వేలు
2, 5 ఫ్లోర్లలో - ఎన్టీపీసీ రూ.32 లక్షల 3 వేల 925
బుద్ధభవన్లో 34 షెట్టర్లు రూ. 25 వేలు
ఖైరతాబాద్ జోన్ - అబిడ్స్ మున్సిపల్ కాంప్లెక్స్
షాపులు ఖాళీగా ఉన్నవి రెంట్ నెలకు
గ్రౌండ్ ఫ్లోర్లో 24 ,10 వెయ్యి నుంచి 10 వేలు
సెల్లార్లో 50,50 సుమారు 3 లక్షలు
