- రూ.3,500 కోట్లతో మరో 12 ప్రాజెక్టులు చేపట్టేందుకు ప్లాన్
- ప్రభుత్వ అనుమతుల కోసం బల్దియా అధికారులు వెయిటింగ్
- మొదటి విడతలోని 47 ఎస్ఆర్డీపీ పనుల్లో ఇంకా 18 పెండింగ్
- ముందు ఆ పనులను పూర్తి చేయాలంటున్న ఎక్స్పర్ట్స్
హైదరాబాద్, వెలుగు:స్ట్రాటజిక్ రోడ్డు డెవలప్మెంట్ ప్లాన్(ఎస్ఆర్ డీపీ) ఫేజ్–1 పనులు పూర్తికాక ముందే ఫేజ్–2 పనులను స్టార్ట్ చేసేందుకు బల్దియాప్లాన్ చేస్తోంది. సిటీలో ఫ్లైఓవర్లు, అండర్ పాస్లు, ఆర్ఓబీలు, ఆర్యూబీలు నిర్మించేందుకు ఎస్ఆర్డీపీని రూపొందించింది. అందులో భాగంగా మొదటి విడతలో రూ.8,092కోట్లతో 47 ప్రాజెక్టులు చేపట్టగా 29 పూర్తయ్యాయి. ప్రస్తుతం18 ప్రాజెక్టుల పనులు నడుస్తున్నాయి. వీటిలో మేజర్గా కైత్లాపూర్ కుడివైపు ఫ్లైఓవర్, చాంద్రాయణగుట్ట, నాగోలు, వీఎస్టీ ఫ్లై ఓవర్లు ఉన్నాయి. ఇవి పూర్తికాక ముందే రూ.3,500 కోట్లతో సెకండ్ ఫేజ్ పనుల స్టార్ట్చేయాలని జీహెచ్ఎంసీ ఆఫీసర్లు నిర్ణయించారు. 12 ప్రాజెక్టులు చేపట్టేందుకు ప్రభుత్వానికి ప్రతిపాదనలు పంపారు. పరిపాలన అనుమతులు వస్తే పనులు స్టార్ట్ చేయాలని చూస్తున్నారు. అయితే ఫేజ్–1లో భాగంగా ప్రారంభించిన పనులను పూర్తి చేశాక ఫేజ్–2కు వెళ్తే బాగుంటుందని ఎక్స్పర్ట్స్ అంటున్నారు. కేవలం ప్రచారం కోసమే కాకుండా స్టార్ట్ చేసినవి పూర్తిగా చేయాలని చెప్తున్నారు.
పర్మిషన్ వస్తే ఈ ప్రాంతాల్లో..
ఎస్ఆర్డీపీ ఫేజ్–2 పనులకు ప్రభుత్వం నుంచి పరిపాలన అనుమతులు ఇస్తే ముందుగా 12 ప్రాజెక్టులు చేపట్టనున్నారు. ఇందులో ఉప్పల్ జంక్షన్ లో మరో ఫ్లైఓవర్, కూకట్పల్లి వైజంక్షన్, బండ్లగూడలో ఫ్లైఓవర్, ఒమర్ హోటల్ జంక్షన్, రేతిబౌలి–నానల్‌నగర్‌లో మల్టీలెవల్ అండర్‌పాస్, ఫలక్ నుమా ఆర్ఓబీ, కుత్బుల్లాపూర్‌లో ఫాక్స్ సాగర్ పైప్‌లైన్‌పై వంతెన నిర్మాణం, ఖాజాగూడలో సొరంగం, మాణికేశ్వర్ నగర్ ఆర్ యూబీ, చిలకలగూడలో ఆర్యూబీ, ఆరాంఘర్‌లో రెండు రూబీలు ఉన్నాయి. ఈ పనుల తరువాత మరికొన్ని చేపట్టాలని ఆలోచిస్తున్నారు. వాటితో పాటే కొత్తవిసిటీలో ఫ్లై ఓవర్లు, అండర్ పాస్లు, ఆర్ఓబీలు, ఆర్యూబీలు నిర్మించేందుకు బల్దియా మొత్తం 23 వేల500కోట్లతో ఎస్ఆర్డీపీని రూపొందించింది. ఫేజ్–1లో ఇప్పటికే 29 ప్రాజెక్టులు పూర్తి కాగా.. మరో 18 పనులు నడుస్తున్నాయి. ఫేజ్–2 స్టార్ట్ చేస్తామని బల్దియా ఆఫీసర్లు చెప్తుండడంతో పాతవాటిని త్వరగా పూర్తి చేయాలని జనం కోరుతున్నారు. ప్రభుత్వం నుంచి అనుమతులు వస్తే ఫేజ్–1 పనులు చేస్తూనే ఫేజ్–2 మొదలు పెడతామని అధికారులు అంటున్నారు.
పెండింగ్ ప్రాజెక్టులివే..
కొత్తగూడ, కొండాపూర్ జంక్షన్ బొటానికల్గార్డెన్ వద్ద మల్టీలెవల్ ఫ్లైఓవర్, గ్రేడ్ సెపరేట్లు, శిల్పా లేఅవుట్ నుంచి గచ్చిబౌలి జంక్షన్ వరకు రోడ్డు నిర్మాణం, ఖైత్లాపూర్ ఆర్ఓబీ, నాగోలు ఫ్లైఓవర్, ఇందిరాపార్కు నుంచి వీఎస్టీ వరకు ఎలివేటెడ్ కారిడార్, ఉప్పల్జంక్షన్ ఫ్లైఓవర్, చాంద్రాయణగుట్ట ఫ్లైఓవర్, సంతోష్ నగర్ ఎలివేటెడ్ కారిడార్, ఫలక్ నుమా ఆర్ఓబీ, శాస్ర్తిపురం ఆర్ఓబీ, ఆరాంఘర్–జూపార్కు ఫ్లైఓవర్, ఎల్బీనగర్ ఆర్ హెచ్ఎస్, బైరామల్గూడ వద్ద నాలుగు ప్రాజెక్టులు పెండింగులో ఉన్నాయి. వీటి పనులు స్లోగా సాగుతున్నాయి.
