న్యూజిలాండ్ జనాన్ని ఇప్పుడీ బొమ్మ పెద్ద పీడకలలా వెంటాడుతోంది. ఇంత అసహ్యమైన, చెత్త బొమ్మను ముందు తీసేయండంటూ జనాలు గగ్గోలు పెడుతున్నారు. ‘ఖాసీ’గా పిలుస్తున్న ఈ చెయ్యి మొహం బొమ్మను వెల్లింగ్టన్లోని సిటీ ఆర్ట్గాలరీపైన నిలబెట్టారు. 16 అడుగుల ఎత్తున్న ఈ విగ్రహం బరువు 400 కిలోలు. ఇంతకుముందు క్రైస్ట్చర్చ్ ఆర్ట్ గ్యాలరీ బిల్డింగ్పై ఉన్న ఈ విగ్రహాన్ని హెలికాప్టర్తో తీసుకొచ్చి వెల్లింగ్టన్ ఆర్ట్ గ్యాలరీపై పెట్టారు. దానికి అయిన ఖర్చు సుమారు ₹33.77 లక్షలట (39 వేల పౌండ్లు). ఈ విగ్రహాన్ని 2016లో రోనీ వాన్ హౌట్ అనే ఆర్టిస్ట్ తయారు చేశాడు. ఇప్పుడీ బొమ్మపైనే జనం మండిపడుతున్నారు. ‘‘మీ మొహంలా ఉందీ చెయ్యి మొహం’’ అంటూ విరుచుకుపడుతున్నారు. ‘‘ఇంత అసహ్యమైన బొమ్మను కళ అని చెప్పుకుని తిరుగుతారా’’ అంటూ ప్రశ్నిస్తున్నారు. పీడకలలా వెంటాడుతుందని అంటున్నారు. అంతేకాదు, ‘‘అచ్చం ట్రంప్లా ఉందే ఈ చెయ్యి మొహం’’ అని సెటైర్లు పేలుస్తున్నారు. విక్టర్ హ్యుజో రాసిన ద హంచ్బ్యాక్ ఆఫ్ నోటర్ డాం బుక్కులోని ఖాసిమోడో పాత్ర స్ఫూర్తిగా దీనిని తయారు చేయించారు. వెల్లింగ్టన్ ఆర్ట్ గ్యాలరీపై మూడేళ్ల పాటు ఈ బొమ్మ ఉండనుంది.
