బషీర్బాగ్, వెలుగు: బీసీలకు విద్య, ఉద్యోగ, స్థానిక సంస్థల ఎన్నికల్లో 42 శాతం రిజర్వేషన్లను రాజ్యాంగబద్ధంగా కల్పిస్తామని చెప్పిన కాంగ్రెస్ ప్రభుత్వం, ఆ మాట తప్పి బీసీలను రాజకీయంగా దగా చేసిందని మాజీ మంత్రి శ్రీనివాస్ గౌడ్ ఆరోపించారు. బీసీ విద్యార్థి సంఘం రాష్ట్ర అధ్యక్షుడు వేముల రామకృష్ణ అధ్వరంలో జీవో 46ను రద్దు చేయాలని, స్థానిక సంస్థల ఎన్నికలను వాయిదా వేయాలని, ఫీజు రీయింబర్స్మెంట్, స్కాలర్షిప్ బకాయిలు విడుదల చేయాలని డిమాండ్ చేస్తూ బర్కత్ పురాలో విద్యార్థులతో కలిసి ర్యాలీ నిర్వహించారు.
లింగంపల్లి చౌరస్తాలో రోడ్డుపై బైఠాయించి నిరసన తెలిపారు. ఈ సందర్భంగా శ్రీనివాస్ గౌడ్ మాట్లాడుతూ.. 42శాతం రిజర్వేషన్లను అమలు చేశాకే స్థానిక సంస్థల ఎన్నికలు నిర్వహించాలని అన్నారు. 17 శాతం రిజర్వేషన్లు కల్పించడం సరికాదన్నారు. వేముల రామకృష్ణ మాట్లాడుతూ.. రీయింబర్స్, స్కాలర్షిప్ బకాయిలు రూ.10 వేల కోట్లు తక్షణమే విడుదల చేయాలని డిమాండ్ చేశారు. కార్యక్రమంలో బీసీ జేఏసీ వర్సింగ్ చైర్మన్ గుజ్జ కృష్ణ, నందగోపాల్, మోహన్, వేణు, రాజేశ్ తదితరులు పాల్గొన్నారు.
