- 615 మంది స్కూల్ అసిస్టెంట్లకే బదిలీలు?
- మిగిలిన బాధిత టీచర్లకు డిప్యూటేషన్లు ఇచ్చే చాన్స్
హైదరాబాద్,వెలుగు: బ్లాక్ చేసిన 13 జిల్లాల్లో స్పౌజ్ పంచాయితీని ముగించేందుకు సర్కారు ప్రయత్నాలు చేస్తోంది. దీనికోసం పలు మార్గాలను వెతుకుతోంది. మొత్తం బాధితుల్లో కొందరికి ట్రాన్స్ఫర్లు చేసి, మరికొందరిని డిప్యూటేషన్పై ఆయా జిల్లాలకు పంపించాలని భావిస్తోంది. ఇందుకు ఉన్న సాధ్యాసాధ్యాలను పరిశీలిస్తోంది. అయితే దీనిపై ఆయా జిల్లాల స్పౌజ్ టీచర్లలో భిన్నాభిప్రాయాలు వ్యక్తమవుతున్నాయి. ఉద్యోగుల జిల్లాలు, జోన్ల అలకేషన్ కోసం ప్రభుత్వం గతేడాది డిసెంబర్లో 317జీవో తీసుకొచ్చింది. హైదరాబాద్ జిల్లా మినహా మిగిలిన 32 జిల్లాల్లో ఈ ప్రక్రియ జరిగింది. 19 జిల్లాల్లో సుమారు 2400 మందికి స్పౌజ్ కేటగిరి కింద బదిలీలు చేపట్టారు. కానీ 13 జిల్లాల్లో పోస్టులు తక్కువగా ఉన్నాయనే కారణంతో ఈ ప్రక్రియను నిలిపివేశారు. ఇలా బ్లాకింగ్ కు గురైన జిల్లాల జాబితాలో హనుమకొండ, వరంగల్, రంగారెడ్డి, మేడ్చల్, కరీంనగర్, సంగారెడ్డి, సిద్దిపేట, సూర్యాపేట, ఆదిలాబాద్, మంచిర్యాల, నిజామాబాద్, ఖమ్మం, మహబూబ్ నగర్ ఉన్నాయి. ఈ జిల్లాల్లో తొలుత 2,566 అప్లికేషన్లు రాగా కొందరికి రివర్స్ స్పౌజ్ ద్వారా బదిలీ కాగా, మ్యూచువల్ ట్రాన్స్ఫర్లు అయ్యారు. ప్రస్తుతం ఇంకో 2100 దరఖాస్తులు పెండింగ్లో ఉన్నాయి. అయితే తమకూ బదిలీలు నిర్వహించాలని ఏడాది కాలంగా ఆయా జిల్లాల స్పౌజ్ టీచర్లు ఆందోళనలు చేస్తున్నారు. కలెక్టరేట్ల నుంచి ప్రగతిభవన్ దాకా అన్నిచోట్లా వివిధ రూపాల్లో నిరసనలు కొనసాగిస్తున్నారు. తమ పిల్లలతో కలిసి నిరసనల్లో పాల్గొంటున్నారు. సీఎం కేసీఆర్ గతంలో ఇచ్చిన హామీనే అమలు చేయాలని వారు డిమాండ్చేస్తున్నారు. ఈ నేపథ్యంలోనే సమస్యను పరిష్కరించే యోచనలో తెలంగాణ సర్కారు పడింది.
కొందరు స్కూల్ అసిస్టెంట్లకు ట్రాన్స్ఫర్లు.!
ప్రస్తుతమున్న అప్లికేషన్లలో 900 వరకూ స్కూల్ అసిస్టెంట్లు ఉన్నారు. వీరిలో సుమారు 615 మందిని ఆయా జిల్లాల్లో సర్దుబాటు చేయాలని సర్కారు యోచిస్తోంది. ఇవన్నీ కూడా ప్రమోషన్ పోస్టుల్లో నింపాలని భావిస్తోంది. అయితే ఎస్ఏ కేటగిరిలోనూ ఇంకో మూడు వందల మందికి మొండిచేయి చూపించే అవకాశముంది. వీరితో పాటు మిగిలిన ఎస్జీటీలు, లాంగ్వేజీ పండిట్లు, పీఈటీ, ఎల్ఎఫ్ఎల్ హెడ్మాస్టర్ అభ్యర్థులను డిప్యూటేషన్పై పంపించాలని యోచిస్తోంది. అయితే గతంలో 1,656 మందిని ట్రాన్స్ఫర్లు చేస్తామని ప్రభుత్వం చెప్పిందని.. తాజాగా ఆ సంఖ్యను 615కు తగ్గించారని బాధిత టీచర్లు చెప్తున్నారు. బాధిత టీచర్లలో చాలామందికి ఇంకా 20 ఏండ్లపైనే సర్వీస్ ఉందనీ, కానీ డిప్యూటేషన్ కేవలం 2,3 ఏండ్లు ఇచ్చే అవకాశముందని ఆందోళన వ్యక్తం చేస్తున్నారు. టీచర్ ఎమ్మెల్సీ ఎన్నికల నేపథ్యంలోనే సర్కారు ఇలాంటి లీక్లు ఇస్తోందనే వాదనలు కూడా వినిపిస్తున్నాయి.
అందరికీ న్యాయం చేయాలె
‘‘13 జిల్లాల్లో ఇప్పటికిప్పుడు 80% స్పౌజ్ బదిలీలు చేపట్టడానికి అవకాశం ఉంది. అయినా కేవలం 30 శాతం బదిలీలు చేపట్టాలని విద్యాశాఖ రెడీ కావడం సరికాదు. అవి కూడా స్కూల్ అసిస్టెంట్లలో కొద్దిమందికి చేస్తామంటున్నారు. ఎక్కువ ఖాళీలున్న ఎస్జీటీ పోస్టులను డైరెక్ట్ రిక్రూట్మెంట్ అనే సాకు చూపించి.. పూర్తిగా బ్లాక్లో ఉంచడం సరికాదు. సీఎం కేసీఆర్ జోక్యం చేసుకొని మాకు న్యాయం చేయాలి.’’
- నరేష్, స్పౌజ్ ఫోరం కో-కన్వీనర్
