మూసీపొంటి.. సర్కారు బిల్డింగ్ లు తరలింపు..సర్కారు సంస్థలకు ఫ్యూచర్ సిటీ, శంషాబాద్లో భూముల కేటాయింపు

• సర్కారు సంస్థలకు ఫ్యూచర్ సిటీ, శంషాబాద్​లో భూముల కేటాయింపు
• త్వరలో ప్రాజెక్టు మొదటిదశ పనులు షురూ
• కొత్త భవనాల డిజైన్ల కోసం కన్సల్టెంట్లకు ఆహ్వానం

హైదరాబాద్​ సిటీ, వెలుగు: మూసీ సుందరీకరణ ప్రాజెక్టులో భాగంగా నదీ పరీవాహక ప్రాంతాల్లో ఉన్న ప్రభుత్వ భవనాలను వేరే ప్రాంతాలకు తరలించాలని ప్రభుత్వం నిర్ణయించింది. ప్రభుత్వం ప్రతిష్టాత్మకంగా చేపట్టిన మూసీ రివర్​ డెవలప్​మెంట్​ ప్రాజెక్టులో భాగంగా మొదటి దశ పనులు త్వరలో ప్రారంభం కానున్నాయి. గండిపేట సమీపంలోని నార్సింగి నుంచి బాపూఘాట్​ వరకు చేపట్టే మొదటి విడత అభివృద్ధి ప్రాజెక్టులో కొన్ని కీలక ప్రాంతాల్లో ప్రభుత్వ భవనాలు అడ్డుగా ఉన్నట్టు ఎంఆర్​డీసీఎల్​ అధికారులు తెలిపారు. ఈ కారణంగా రంగారెడ్డి జిల్లా గండిపేట మండల పరిధిలో ఉన్న వాటర్​ అండ్​ ల్యాండ్​ మేనేజ్​మెంట్​ట్రెయినింగ్ అండ్​ రీసెర్చ్​ ఇన్​స్టిట్యూట్​(వాలంతరి), రాజేంద్ర నగర్ లోని ఇన్​స్టిట్యూట్​ ఆఫ్​ కోఆపరేటివ్​ మేనేజ్​మెంట్​(ఐసీఎం), తెలంగాణ ఇన్​స్టిట్యూట్​ ఆఫ్​ రూరల్​ డెవలప్​మెంట్​(టీజీఐఆర్​డీ), తెలంగాణ స్టేట్​ కోఆపరేటివ్​ అపెక్సట్​ బ్యాంక్​ ట్రెయినింగ్​ సెంటర్​ (టీజీసీఏబీ), ఎస్​సీ, ఎస్​టీ ఐఏఎస్​ స్టడీ సర్కిల్స్​తో పాటు ఇంటిగ్రేటెడ్​ వెజిటేబుల్స్​అండ్​ ఫ్లవర్​ మార్కెట్లను ప్రస్తుతం ఉన్న ప్రాంతాల నుంచి తరలించనున్నారు. కేంద్ర, రాష్ట్ర ప్రభుత్వానికి చెందిన ఈ భవనాలకు ప్రత్యామ్నాయంగా ఫ్యూచర్​సిటీ, శంషాబాద్​లోని హెచ్​ఎండీఏ లేఔట్స్​లో భూములను కేటాయించాలని నిర్ణయించినట్టు సమాచారం. ఆయా ప్రాంతాల నుంచి ఓఆర్​ఆర్​ కు మెరుగైన కనెక్టివిటీ ఉండేలా చర్యలు తీసుకుంటున్నట్టు ఎంఆర్​డీసీఎల్​కు చెందిన ఉన్నతాధికారి ఒకరు తెలిపారు. 

కొత్త భవనాల నిర్మాణాల కోసం కన్సల్టెంట్లకు ఆహ్వానం

మూసీ పరీవాహక ప్రాంతాల నుంచి తరలించే ఆయా ఇన్​స్టిట్యూషన్లకు ఫ్యూచర్​సిటీ, శంషాబాద్​లో అవసరమైన భూములను కేటాయించనున్నారు. అంతే కాకుండా కొత్త భవనాల నిర్మాణానికి డిటెయిల్డ్​ ఆర్కిటెక్చరల్, స్ట్రక్చరల్, మెకానికల్, ఎలక్ట్రికల్, ప్లంబింగ్​ డిజైన్​ల కోసం పేరు పొందిన కన్సల్టెంట్స్​ను నియమించేందుకు త్వరలో టెండర్లను పిలవ నున్నట్టు ఎంఆర్​డీసీఎల్​ ఉన్నతాధికారులు తెలిపారు. కన్సల్టెంట్స్​ ఆర్కిటెక్చర్, లే ఔట్​ప్లాన్​లకు సంబంధించి డీపీఆర్​లను సమర్పించిన తర్వాత భవనాల నిర్మాణాలను చేపట్టనున్నట్టు అధికారులు తెలిపారు. ఆయా భవనాల నిర్మాణాలకు సంబంధించి ఇండియన్​ స్టాండర్డ్​ కోడ్​(ఐఎస్​), నేషనల్ బిల్డింగ్​ కోడ్​(ఎన్​బీసీ), కన్జర్వేషన్​ బిల్డింగ్​కోడ్​(ఈసీబీసీ), తెలంగాణ బిల్డింగ్​ రెగ్యులేషన్​, ఫ్యూచర్​సిటీ ప్లానింగ్​ అండ్​ సస్టెయినబులిటీ గైడ్​లైన్స్​ వంటి నార్మ్​స్​కు తగ్గట్టుగా ఆయా భవనాలను నిర్మించడానికి ఎంఆర్​డీసీఎల్​ కృషి చేస్తుందని అధికారులు తెలిపారు.