యాదగిరిగుట్ట, వెలుగు: యాదగిరిగుట్ట లక్ష్మీనరసింహస్వామి దేవస్థానంలో ఆలయ క్షేత్రపాలకుడైన ఆంజనేయస్వామికి 'ఆకు పూజ'ను ఆలయ అర్చకులు మంగళవారం ఘనంగా నిర్వహించారు. కొండపైన విష్ణుపుష్కరిణి పక్కన ఉన్న హనుమాన్ టెంపుల్ లో స్వామివారి మూలవిరాట్ కు ప్రత్యేక పూజలు నిర్వహించారు.
మొదట అంజన్న మూలవిరాట్ ను పవిత్ర జలంతో శుద్ధి చేసి మన్యసూక్త పారాయణాలతో అభిషేకం చేశారు. సింధూరంతోపాటు పలు రకాల సుగంధ ద్రవ్యాలు, పూలమాలలతో అంజన్న విగ్రహాన్ని అందంగా అలంకరించి ప్రత్యేకంగా తెప్పించిన తమలపాకులతో అర్చన జరిపారు. అనంతరం స్వామివారికి ఇష్టమైన వడపప్పు, బెల్లం, అరటిపండ్లను నైవేద్యంగా సమర్పించి భక్తులకు పంపిణీ చేశారు.
