బుల్డోజర్లు దించిన ఖట్టర్ సర్కార్
అల్లర్లకు కారణమైన వారిపై చర్యలు
గురుగ్రామ్: హర్యానాలోని నూహ్ జిల్లాలో అల్లర్లకు కారణమైన వారిపై అక్కడి ప్రభుత్వం చర్యలు చేపట్టింది. ఉత్తరప్రదేశ్ తరహాలో బుల్డోజర్లను రంగంలోకి దించింది. హింస జరిగిన ఏరియా నుంచి 20 కిలో మీటర్ల దూరంలోని టౌరు ప్రాంతంలో ఉన్న ప్రభుత్వ భూమిని కొందరు ఆక్రమించుకున్నారు. ఆ ప్లేస్లో వాళ్లు ఏర్పాటు చేసుకున్న 250 గుడిసెలను అధికారులు కూల్చేశారు. ఈ గుడిసెల్లో ఉన్నవాళ్లే అల్లర్లకు కారణమయ్యారని భావించి ప్రభుత్వం ఈ చర్యకు పాల్పడినట్లు తెలుస్తున్నది.
హింసాకాండలో వలసదారుల హస్తం ఉందంటూ ఇప్పటికే జిల్లా అధికారులతో పాటు సీఎం మనోహర్ లాల్ ఖట్టర్ ఆరోపించారు. మున్సిపల్ అధికారులు మాత్రం ఈ రూమర్లను ఖండించా రు. హర్యానా షహరీ వికాస్ ప్రాధికారన్ (హెచ్ఎస్వీపీ) భూమిని గతంలో బంగ్లాదేశ్ అక్రమ వలసదారులు ఆక్రమించుకున్నారని తెలిపారు. అందుకే, ఆ గుడిసెలు కూల్చేశామని వివరించారు. కూల్చివేతకు, ఇటీవల జరిగిన హింసకు ఎలాంటి సంబంధం లేదన్నారు. ఆక్రమణల తొలగింపు డ్రైవ్ను ఆ ప్రాంతంలోని కొందరు మహిళలు అడ్డుకునే ప్రయత్నం చేశారు. అయితే, వారిని మహిళా పోలీస్ ఫోర్స్ టీమ్లు నిలువరించాయి.
గురుగ్రామ్లో హిందూ సంస్థల నిరసన
నూహ్ అల్లర్లను నిరసిస్తూ గురుగ్రామ్లోని పటౌడీ ఏరియాలో శుక్రవారం హిందూ సంస్థలు నిరసన ప్రదర్శన చేపట్టాయి. ఈ సందర్భంగా బంద్కు పిలుపునివ్వడంతో పటౌడీ, జటౌలీ మార్కెట్లు మూతపడ్డాయి. హింసకు కారణమైన వారిపై కఠిన చర్యలు తీసుకోవాలంటూ పటౌడీ సబ్ కలెక్టర్ ద్వారా రాష్ట్రపతి, హర్యానా గవర్నర్, సీఎంకు మెమోరాండమ్ సమర్పించాయి. శుక్రవారం కావడంతో గురుగ్రామ్లోని మసీదుల్లో నమాజ్కు పోలీసులు అనుమతివ్వలేదు. మత పెద్దలతో మాట్లాడి తమ తమ ఇండ్లలోనే నమాజ్ చేసుకునేలా సూచించారు.