ఆదివారం(జూన్ 4) సాయంత్రం తెలంగాణలో ఉరుములు, మెరుపులు, ఈదురుగాలులతో కూడిన భారీ వర్షం కురిసింది. దీంతో పలు ప్రాంతాలలో చెదురు ముదురు ఘటనలు చోటుచేసుకున్నాయి. ఈ వర్షం పలుచోట్ల తీవ్ర విషాదాన్ని నింపగా, మరికొన్ని చోట్ల పిడుగులు పడటం, చెట్లు నేలకొరగడం వంటి ఘటనలు జరిగాయి.
సంగారెడ్డి:
సంగారెడ్డి జిల్లా రామచంద్రపురం మండలం ఎల్ఐజి కాలనీలో కొబ్బరి చెట్టుపై పడ్డ పిడుగు పడింది. ఈ ఘటనలో చెట్టు పూర్తిగా దగ్ధమైంది.
మేడ్చల్ జిల్లా:
మేడ్చల్ జిల్లా, కీసర మండలంలోని కీసర, బోగారం, తిమ్మాయపల్లి, యాదగిరిపల్లి, అంకిరెడ్డిపల్లి, చిర్యాల్, దాయరా గ్రామలల్లో ఈదురు గాలులతో కూడిన భారీ వర్షం కురిసింది. ఈ గాలులకు పలుచోట్ల ఇంటి పైకప్పులు ఎగిరిపోయాయి.
జగిత్యాల:
కోరుట్ల నియోజకవర్గ పరిధిలో ఈదురుగాలులతో కూడిన వర్షం కురిసింది. ఈ గాలులకు బీఆర్ఎస్ పార్టీకి చెందిన ప్రచార ఆర్చీ రహదారికి అడ్డంగా కూలింది. దీంతో కోరుట్ల-మెట్ పల్లి రహదారిలో ట్రాఫిక్ కు అంతరాయం కలిగింది.
వికారాబాద్ జిల్లా:
వికారాబాద్ జిల్లాలోని కుల్కచర్ల మండలం సాల్వీడ్ లో గొర్రెల మందపై పిడుగు పడింది. ఈ ఘటనలో గడుసు అంజయ్య అనే రైతుకు చెందిన 9 గొర్రెలు, బసమ్మ అనే మహిళకు చెందిన 10 గొర్రెలు మృతి చెందాయి. అదే గ్రామంలో మరోచోట పిడుగు పడగా, ఈ ఘటనలో అంజిలయ్య అనే రైతుకు చెందిన 3 గొర్లు, కృష్ణయ్య అనే రైతుకు చెందిన 4 గొర్రెలు మృతి చెందాయి.
సంగారెడ్డి:
సంగారెడ్డి పరిధిలోని నారాయణఖేడ్ నియోజకవర్గంలోని కంగ్టి, నాగల్ గిద్ద, మనూర్ మండలాల్లో ఈదురుగాలులతో కూడిన భారీ వర్షం కురిసింది. ఈ గాలుల ధాటికి పలుచోట్ల ఇంటి పైకప్పు రేకులు ఎగిరిపోగా, మరికొన్ని చోట్ల భారీ వృక్షాలు నేలకొరిగాయి.
ఖమ్మం:
ఖమ్మం పరిధిలోని గోపాలపురంలో పెను ప్రమాదం తప్పింది. ఈదురు గాలులకు ప్రధాన రహదారిపై సెంట్రల్ లైటింగ్ స్తంభం నేలకొరిగింది. అయితే ఆ సమయంలో రహదారిపై ఎవరు లేకపోవడంతో అంతా ఊపిరి పీల్చుకున్నారు.
