గుండెపోటు అనేది పెద్దవారికి వారికి మాత్రమే వస్తుందన్నది ప్రజలలో ఉన్న భావన. అది వాస్తవం కాదు. ప్రస్తుతం వయస్సుతో సంబంధం లేకుండా అందరూ దీని బారిన పడుతున్నారు. పది రోజుల పసిబిడ్డ కూడా గుండెపోటుకు గురవుతోంది. ఆ కోవకు చెందిందే ఈ కథనం. 10 రోజుల బిడ్డకు గుండెపోటు రాగా.. సీపీఆర్ చేసి ఆ బిడ్డకు ప్రాణం పోశారు.. వైద్యులు.
కళ్యాణదుర్గం ప్రాంతానికి చెందిన జయమ్మ అనే మహిళ ఇటీవల పండంటి బిడ్డకు జన్మనిచ్చింది. అయితే సదరు మహిళకు హైబీపీ ఉన్నందున ఏడో నెలలోనే సి-సెక్షన్ చేసి.. బిడ్డను బయటకు తీశారు. ఆ సమయంలో శిశువు బరువు కేవలం 1.5 కిలోలు మాత్రమే. ఏడో నెలలో జన్మించడంతో శిశువు గుండె, ఊపిరితిత్తులు, కాలేయం, మూత్రపిండాల పనితీరు సరిగా ఉండేది కాదు. అందునా ప్లేట్లెట్ కౌంట్ 9000కి పడిపోవడంతో.. గుండెకు రక్త ప్రసరణ సరిగా జరిగేది కాదు.
ఈ క్రమంలో బిడ్డకు మెరుగైన ఆరోగ్యం కోసం సదరు వైద్యులు.. హైదరాబాద్‌లోని ఓ కార్పొరేట్ ఆసుపత్రికి రిఫర్ చేశారు. ఆ సమయంలో శిశువు ఆరోగ్యం అంతంతమాత్రమే. దీంతో వైద్యులు.. 6 రోజుల పాటు బిడ్డను కృత్రిమ వెంటిలేషన్‌లో ఉంచి వైద్యం అందించే ప్రయత్నం చేశారు. అయితే ఆ సమయంలో ఉన్నట్టుండి పసికందు గుండె ఆగిపోయింది. వెంటనే అప్రమత్తమైన వైద్యులు.. బిడ్డకు సీపీఆర్ చేసి ప్రాణం పోశారు.
శిశువు వయస్సు 10 రోజులు మాత్రమే. అందునా బహుళ అవయవ వైఫల్యం ఉన్నప్పటికీ సీపీఆర్ చేసి ప్రాణం పోసిన వైద్యులకు ఆ తల్లిదండ్రులు కృతజ్ఞతలు తెలిపారు.
