హైదరాబాద్, వెలుగు: అటు ఇటు గుట్టలు.. మధ్యలో తోవ.. అలాంటి దారుల్లో పోతుంటే మస్తు థ్రిల్లింగ్గా ఉంటది. ఏదో అడ్వెంచర్ రైడ్ చేస్తున్నమనే ఫీల్ కూడా వస్తది. అలాంటి ఎక్స్ పీరియన్స్ కావాలంటే ఏ హిల్ ఏరియాలకో పోవాలని అనుకుంటరు. కానీ ఆ అవసరమే లేదు. మన దగ్గర్నే అలాంటి రోడ్లు మస్తు ఉన్నయ్. సిటీలో ట్రాఫిక్ని తగ్గించడానికిప్రభుత్వం అప్పట్లో లింక్ రోడ్లనే కాన్సెప్ట్ను తీసుకొచ్చింది. ఈ లింక్ రోడ్లు రూట్లను కలుపుతూ ఉంటాయి. ట్రాఫిక్ని కంట్రోల్ చేయడానికి గుట్టలను, బండలను సాఫ్ చేస్తూ ఈ లింక్ రోడ్లను ఏర్పాటు చేసిన్రు. ప్రస్తుతం సిటీలో 33కి పైగా లింక్ రోడ్లున్నయ్. ఈ రోడ్ల పక్కనే గుట్టలు, చెట్లు, చెరువులు ఉన్నయ్. ఇంకేముంది సిటిజన్లకు నయా రీఫ్రెష్మెంట్ అడ్డాలుగా ఇవి మారిపోయినయ్. జీహెచ్ఎంసీ కూడా ఆ రోడ్ల పక్కన ఉన్న పార్కులు, లేక్లకు లైటింగ్లు పెట్టి మరింత అందంగా ముస్తాబు చేస్తోంది. జనాలు ఆ రూట్లలో పోయేటందుకు ఎక్కువ ఇంట్రెస్ట్ చూపిస్తున్నరు. ఫొటోషూట్లు కూడా చేసుకుంటుకున్నారు. దీంతో ప్రస్తుతం ఆ రూట్లు టూరిస్ట్ స్పాట్లుగా మారినయ్.
ట్రాఫిక్ డైవర్షన్స్ కోసం..
సిటీలో రద్దీ ఏరియాల్లో, ఐటీ కారిడార్ రూట్లలో ట్రాఫిక్ జామ్ ఎక్కువగా ఉంటుంది. మెయిన్ రోడ్ల ట్రాఫిక్ని మళ్లించడానికి ఏర్పాటుచేసినవే ఈ లింక్ రోడ్లు. ఖాజాగూడ, బయో డైవర్సిటీ, రాయదుర్గం, శేరిలింగంపల్లి, మియాపూర్, నిజాంపేట్ ఏరియాల్లో ఈ లింక్ రోడ్లున్నాయి. ట్రాఫిక్,
పొల్యూషన్ ఎక్కువ లేకపోవడంతో చాలామంది ఈ రూట్లలో వెళ్లేందుకు ఇంట్రెస్ట్ చూపిస్తున్నారు. కొత్తగా వేసిన రోడ్లతో పాటు, అటు ఇటు గుట్టలు, గ్రీనరీ ఉండటంతో లింక్ రోడ్లను సిటీజనం ఇష్టపడుతున్నారు. ఒకప్పుడు మణికొండ, ఖాజాగూడ వాసులు గచ్చిబౌలి వెళ్లాలంటే నానక్రాం గూడ రోడ్ మీదుగా వెళ్లేవారు. ఇప్పుడు ఖాజాగూడ లేక్ పక్క నుంచి లింక్ రోడ్ వేసి దాన్ని ఈఎస్సీఐ రోడ్గా చేశారు. దీంతో వాహనదారులు తక్కువ టైమ్లో ఈజీగా వెళ్తున్నారు.
ఇప్పుడు ఇవే విజిటింగ్ స్పాట్లు..
ఒకప్పుడు సిటీలో ట్యాంక్ బండ్, నెక్లెస్ రోడ్, లుంబినీ పార్క్ల దగ్గర జనాల రద్దీ ఎక్కువగా కనిపించేది. ఫొటో షూట్స్ కూడా జరిగేవి. ప్రస్తుతం దుర్గం చెరువు కేబుల్ బ్రిడ్జి, సిటీ శివార్లు, లేక్స్, పార్కులను స్పాట్స్ గా చేసుకుంటున్నారు. అందులో భాగంగానే ఈ లింక్ రోడ్లు కూడా టూరిస్ట్ స్పాట్స్గా మారిపోయాయి. రీఫ్రెష్ మెంట్కు సరికొత్త అడ్డాలుగా ఉంటున్నాయి . దీంతో పాటు బల్దియా అధికారులు ఈ రూట్లలో లైట్లు, పార్కులు, లేక్ల దగ్గర లైటింగ్ ఏర్పాటు చేస్తున్నారు. సోషల్ మీడియా ఇన్ఫ్లుయెన్సర్లు, వీడియోలు చేసేవారు, ఫొటోషూట్స్ చేసుకునేవారు ఈ స్పాట్లను డిఫరెంట్ కాన్సెప్ట్ల కోసం వాడుకుంటున్నారు.
వీకెండ్ బెస్ట్ ఆప్షన్
రీసెంట్గా యూట్యూట్లో ఖాజాగూడ లేక్ వీడియో చూసి అక్కడికి వెళ్లా. పార్కు చాలా బాగుంది. వాకింగ్ ట్రాక్ ఏర్పాటు చేశారు. అక్కడ కూర్చుని చూస్తే చుట్టూ కనిపించే కొండలు అట్రాక్ట్ చేస్తాయి. ఫుట్ పాత్, రోడ్ చాలా నీట్గా ఉంది. వీకెండ్స్ ఫ్యామిలీతో ఇక్కడికి వచ్చి ప్రశాంతంగా టైమ్ స్పెండ్ చేయొచ్చు.
-శివాని, ఫ్యాషన్ డిజైనర్, గచ్చిబౌలి
ట్రాఫిక్ సమస్య తగ్గింది
జూబ్లీహిల్స్, మాదాపూర్ వెళ్లాలంటే ఒకప్పుడు ఫిలింనగర్ రూట్ లేదా గచ్చిబౌలి వైపు నుంచో మొత్తం తిరిగి వెళ్లేవాళ్లం. ఇప్పుడు మణికొండ దర్గా నుంచి మహాప్రస్థానం మీదుగా కొత్తగా వేసిన లింక్ రోడ్లో వెళ్తున్నాం. ఈ దారిలో ఒకప్పుడు బండలు, గుట్టలు ఉండేవి. ఇప్పుడు వాటి మధ్యలో వేసిన లింక్ రోడ్ నుంచి వెళ్తుంటే కొత్తగా ఉంది. లింక్ రోడ్ల వల్ల ట్రాఫిక్ సమస్య తగ్గింది. టైమ్ కూడా సేవ్ అవుతోంది.
- ఉజ్వల్, ఐటీ ఎంప్లాయ్, మణికొండ
