తమిళ చిత్ర పరిశ్రమలో 'ధీనా', 'గజిని', 'తుపాకీ' వంటి సంచలన విజయాలతో తనకంటూ ఒక ప్రత్యేక ముద్ర వేసుకున్న దర్శకుడు ఏఆర్ మురుగదాస్. ఇటీవల 'మదరాసి' మూవీతో ప్రేక్షకులను పలకరించిన ఈ దిగ్గజ దర్శకుడు, ఇప్పుడు తన కెరీర్లోనే అత్యంత ప్రతిష్టాత్మకమైన, భావోద్వేగంతో కూడిన ఒక ప్రాజెక్టును పట్టాలెక్కించేందుకు సిద్ధమవుతున్నారు. విశేషం ఏమిటంటే.. ఈ సినిమా ఐడియా ఈరోజుది కాదు, సరిగ్గా 25 ఏళ్ల క్రితం ఆయన మనసులో పుట్టిన ఒక అద్భుతమైన కల.
అసిస్టెంట్ డైరెక్టర్గా ఉన్నప్పుడే బీజం..
2001లో అజిత్తో తీసిన 'ధీనా' సినిమా కంటే ముందే మురుగదాస్ ఒక వినూత్నమైన కథను సిద్ధం చేసుకున్నారు. ఆయన అసిస్టెంట్ డైరెక్టర్గా పనిచేస్తున్న రోజుల్లోనే.. ఒక కోతిని ప్రధాన పాత్రలో పెట్టి, పిల్లల నుంచి పెద్దల వరకు అందరినీ ఆకట్టుకునేలా ఒక ఫుల్ లెంగ్త్ కామెడీ ఎంటర్టైనర్ తీయాలని భావించారు. అయితే, ఆ సమయంలో సాంకేతిక పరిజ్ఞానం (VFX) అందుబాటులో లేకపోవడం, బడ్జెట్ పరిమితుల వల్ల ఆ కల సాకారం కాలేదు.
గ్రాఫిక్స్ మాయాజాలంతో కొత్త ప్రయోగం!
కాలచక్రం 25 ఏళ్లు ముందుకు సాగినా, ఆ ఆలోచన మాత్రం మురుగదాస్ మదిలో అలాగే ఉండిపోయింది. ఇప్పుడు హాలీవుడ్ స్థాయిలో గ్రాఫిక్స్ అందుబాటులోకి రావడంతో, ఆ పాత ఐడియాకు మరిన్ని హంగులు జోడించి ఈ 'యానిమల్-కామెడీ' ప్రాజెక్టును ప్రారంభించబోతున్నారు. "పిల్లలను దృష్టిలో ఉంచుకుని, అత్యాధునిక గ్రాఫిక్స్ సాయంతో ఈ సినిమా ఉంటుంది. నా కెరీర్ మొదట్లో ఏదైతే చేయాలనుకున్నానో, దానికి ఇప్పుడు సరైన సమయం వచ్చింది అని మురుగదాస్ భావిస్తున్నట్లు సమాచారం.
ఆసక్తి రేపుతున్న డీటెయిల్స్
ప్రస్తుతం ఈ ప్రాజెక్టు స్క్రిప్ట్ వర్క్ జరుగుతోంది. ఇందులో నటించబోయే హీరో ఎవరు? భారీ గ్రాఫిక్స్ కోసం ఏ కంపెనీతో టైఅప్ అవుతున్నారు? అనే విషయాలపై త్వరలోనే అధికారిక ప్రకటన వచ్చే అవకాశం ఉంది. యాక్షన్ సినిమాలకే కేరాఫ్ అడ్రస్గా మారిన మురుగదాస్, ఇప్పుడు రూట్ మార్చి 'కామెడీ' జానర్లో అది కూడా ఒక కోతి ప్రధాన పాత్రలో సినిమా తీస్తుండటంతో అంచనాలు అప్పుడే మొదలైపోయాయి. ఒక దర్శకుడికి తన మొదటి కల ఎప్పుడూ ప్రత్యేకం. పాతికేళ్ల నిరీక్షణ తర్వాత మురుగదాస్ తన డ్రీమ్ ప్రాజెక్టును ఎలా ఆవిష్కరిస్తారో చూడాలి!
