వామ్మో చలి.. మొయినాబాద్లో 6.3 డిగ్రీలు నమోదు.. హైదరాబాద్లో ఎందుకింత చలి..?

• మొయినాబాద్లో 6.3 డిగ్రీలు నమోదు
• 14 జిల్లాల్లో సింగిల్​ డిజిట్ ఉష్ణోగ్రతలు

హైదరాబాద్, వెలుగు: రాష్ట్రంలోని వివిధ జిల్లాల్లో చలి తీవ్రత కొనసాగుతున్నది. హైదరాబాద్ ​సిటీ, శివారు ప్రాంతాల్లో మరింత తీవ్రమైంది. రాష్ట్రవ్యాప్తంగా నైట్​టెంపరేచర్లు 11 డిగ్రీల లోపు నమోదవుతుండగా.. అత్యల్పంగా రంగారెడ్డి జిల్లా మొయినాబాద్​లో 6.3 డిగ్రీల టెంపరేచర్​ రికార్డయింది. అలాగే, సంగారెడ్డి జిల్లా కోహిర్​లో 6.5 డిగ్రీల కనిష్ట ఉష్ణోగ్రత నమోదైంది.

హైదరాబాద్​ సిటీలో చలి తీవ్రత గత 3 రోజుల్లో చాలా పెరిగింది. ఇప్పటిదాకా ఈ సీజన్​లో సిటీలో నమోదైన అత్యల్ప ఉష్ణోగ్రత 6.3 డిగ్రీలే కావడం గమనార్హం. హెచ్సీయూ వద్ద 7.5 డిగ్రీలు, ఇబ్రహీంపట్నంలో 7.6, మౌలాలిలో 8.1, రాజేంద్రనగర్​లో 8.5, బీహెచ్​ఈఎల్​లో 9.3, శివరాంపల్లిలో 9.3, గచ్చిబౌలిలో 9.7, అల్వాల్​ టెలికాం కాలనీలో 10 డిగ్రీల నైట్​ టెంపరేచర్లు నమోదయ్యాయి.

మచ్చబొల్లారం, అంబేద్కర్​నగర్, కుత్బుల్లాపూర్​ ప్రాంతాల్లో 10 డిగ్రీల మేర రాత్రి ఉష్ణోగ్రతలు రికార్డయ్యాయి. మరో 9 చోట్ల 11 డిగ్రీలు నమోదయ్యాయి. మరోవైపు, రాష్ట్రంలోని 14 జిల్లాల్లో సింగిల్ ​డిజిట్​ టెంపరేచర్లు రికార్డయ్యాయి. కుమ్రంభీం ఆసిఫాబాద్​ జిల్లా గిన్నెధారిలో 7.1 డిగ్రీల నైట్​ టెంపరేచర్​ నమోదైంది.

వికారాబాద్​ జిల్లా మోమిన్​పేటలో 7.4, మెదక్​ జిల్లా దామరంచలో 8.2, సిద్దిపేట జిల్లా తిప్పారంలో 8.3, ఆదిలాబాద్​ జిల్లా సోనాలలో 8.5, కామారెడ్డి జిల్లా రామలక్ష్మణపల్లెలో 8.6, నారాయణపేట, నిర్మల్​ జిల్లాల్లో 9.2, నాగర్​కర్నూల్​లో 9.4, నిజామాబాద్​జిల్లాలో 9.7, జగిత్యాల జిల్లాలో 9.9 డిగ్రీల రాత్రి ఉష్ణోగ్రతలు నమోదయ్యాయి.