న్యూఢిల్లీ: కరోనా మహమ్మారి కారణంగా దేశ ఆర్థిక వ్యవస్థ పడిపోయిందని, ఇలాంటి సమయంలో ఇండియన్ కంపెనీలను టేకోవర్ చేసుకునేందుకు ఫారిన్ కంపెనీలు పొంచి ఉన్నాయని కాంగ్రెస్ నేత రాహుల్ గాంధీ హెచ్చరించారు. ఈ మేరకు ఆయన ట్వీట్ చేశారు. విదేశాల్లో కంపెనీల నుంచి మన కార్పొరేట్లను కాపాడుకునేందుకు తగిన చర్యలు తీసుకోవాలని కేంద్ర ప్రభుత్వానికి సూచించారు. విపత్కర పరిస్థితుల్లో ఫారిన్ కంపెనీలు మన కార్పొరేట్లను హస్తగతం చేసుకోకుండా చూడాలని కోరారు. హౌజింగ్ డెవలప్మెంట్ ఫైనాన్స్ కార్పొరేషన్(హెచ్డీఎఫ్సీ)లో 1.01 శాతం వాటాను పీపుల్స్ బ్యాంక్ ఆఫ్ చైనా కొనుగోలు చేసిన మరుసటి రోజే రాహుల్ ఈ ట్వీట్ చేశారు. మార్చితో ముగిసిన త్రైమాసికంలో చైనా బ్యాంక్.. హెచ్డీఎఫ్సీలో దాదాపు 1.75 కోట్ల షేర్లను కొనుగోలు చేసింది.
‘‘భారీగా ఎకానమీ పడిపోతున్న సందర్భంలో కార్పొరేట్లను విదేశీ బడా సంస్థలు స్వాధీనం చేసుకునేందుకు ప్రయత్నించవచ్చు. జాతీయ సంక్షోభం ఉన్న ఇలాంటి సమయంలో ఇండియన్ కార్పొరేట్లను ఫారిన్ కంపెనీలు కంట్రోల్ చేసే ఎలాంటి పరిస్థితులను అనుమతించకూడదు’’ అని రాహుల్ ట్వీట్ చేశారు.
