- మిస్టరీగానే ఇంజక్షన్ మర్డర్
- పోలీసుల అదుపులో ముగ్గురు నిందితులు?
- వివాహేతర సంబంధం నేపథ్యంలోనే హత్య ?
- సిరంజీలోని మందు శాంపిల్ ఫోరెన్సిక్ ల్యాబ్కు..
ఖమ్మం/ ముదిగొండ, వెలుగు: రాష్ట్రవ్యాప్తంగా సంచలనం సృష్టించిన ఇంజక్షన్ మర్డర్ ఇష్యూ ఇంకా మిస్టరీగానే ఉంది. ఖమ్మం జిల్లా ముదిగొండ మండలంలోని బాణాపురం, వల్లభి గ్రామాల మధ్య సోమవారం జరిగిన ఈ హత్యకు కారణాలు తెలుసుకోవడానికి పోలీసులు ఇంకా ఎంక్వైరీ చేస్తున్నామని చెబుతుండగా, వివాహేతర సంబంధం నేపథ్యంలో ఈ మర్డర్ జరిగినట్టు ప్రచారం సాగుతోంది. మృతుడు జమాల్ సాహెబ్(48) కుటుంబసభ్యులు తమకు ఎవరిపై అనుమానాలు లేవని చెప్పారు. దీంతో ఖమ్మం రూరల్ ఏసీపీ బస్వారెడ్డి, సీఐ శ్రీనివాసరావు ఆధ్వర్యంలో వల్లభి పెట్రోల్బంక్ లో ఉదయం 9.27 నుంచి 9.40 గంటల వరకు ఉన్న సీసీ ఫుటేజీని స్వాధీనం చేసుకున్నట్టు తెలుస్తోంది. ఇందులో కొందరు అనుమానితులను గుర్తించినట్టు సమాచారం.
మూడు నిమిషాల్లోపే మర్డర్
సోమవారం ఉదయం 9 గంటలకు చింతకాని మండలం బొప్పారం నుంచి టూ వీలర్పై ఏపీలోని తన కుమార్తె ఇంటికి జమాల్ బయల్దేరాడు. బాణాపురం దాటిన తర్వాత నిందితుడు లిఫ్ట్ అడగడంతో ఎక్కించుకున్నాడు. రెండు కిలోమీటర్ల దూరం వెళ్లేలోపే బైక్పై ఎక్కించుకున్న వ్యక్తి తనకేదో గుచ్చాడంటూ రోడ్డు పక్కన పనిచేసుకుంటున్న కూలీలకు చెప్పి పడిపోయాడు. దీంతో ఆ మూడు నిమిషాల్లోనే ముందుగా సిద్ధం చేసుకొని ఉన్న ఇంజక్షన్ఇచ్చి ఉంటాడని పోలీసులు భావిస్తున్నారు. ఇంజక్షన్లో వాడిన మందు కుక్కలను చంపేందుకు ఉపయోగించే మెడిసిన్ గా ప్రచారం జరిగినా, ఆపరేషన్ల టైంలో ఉపయోగించే అనస్తీషియా మందు ఎక్కువ డోస్లో ఇచ్చి ఉండొచ్చన్న అనుమానాలు వ్యక్తమవుతున్నాయి. వారిచ్చిన ఇంజక్షన్ రక్తంలో నేరుగా కలిస్తే నాలుగు నిమిషాల్లో, కండరాల్లోకి ఎక్కిస్తే 15 నిమిషాల్లో బిగుసుకుపోయి ఊపిరి ఆడక మనిషి చనిపోయే ప్రమాదం ఉంటుందని డాక్టర్లు చెబుతున్నారు. దీన్ని బట్టి మెడిసిన్పై అవగాహన ఉన్న వ్యక్తి ఈ దారుణం చేసి ఉండొచ్చన్న అభిప్రాయానికి పోలీసులు వచ్చారు. అయితే ఇంజక్షన్ లో ఉన్న మెడిసిన్ ఏమిటో తెలుసుకునేందుకు శాంపిల్ ను ఫోరెన్సిక్ ల్యాబ్ కు పంపించినట్టు చెబుతున్నారు. రెండు వారాల్లో రిపోర్ట్ వచ్చే అవకాశం ఉందని అంటున్నారు.
ప్లాన్ ప్రకారమే హత్య
జమాల్ సాహెబ్ బండిపై ఎక్కడానికి ముందు నిందితుడు మరో వ్యక్తిని కూడా లిఫ్ట్ అడిగాడని, అతను బండి ఆపాక ఎక్కకుండా పంపించివేశాడని స్థానికులు చెబుతున్నారు. అంటే, జమాల్ సాహెబ్ ను లక్ష్యంగా చేసుకునే, ప్లాన్ ప్రకారమే అక్కడ వేచి ఉన్నాడనే అనుమానాలు బలపడుతున్నాయి. ఇంజక్షన్ గుచ్చిన వెంటనే నిందితుడు అప్పటికే మరో బండిపై ఫాలో అవుతున్న వ్యక్తితో కలిసి వెళ్లినట్టు పోలీసుల ఎంక్వైరీలో తేలింది. మరోవైపు నిందితుడు మంకీ క్యాప్ పెట్టుకొని ఉన్నాడని ముందుగా పోలీసులకు ఇన్ఫర్మేషన్ రాగా, ఎంక్వైరీలో మాత్రం మాస్క్ పెట్టుకొని, రెడ్ షర్ట్ వేసుకొని ఉన్నాడని తేలింది. 5.5 అడుగుల ఎత్తుతో 28 నుంచి 30 ఏండ్ల మధ్య వయస్సు ఉండొచ్చని కొందరు ప్రత్యక్ష సాక్షులు పోలీసులకు చెప్పారు.
ఆర్ఎంపీ సలహా తీసుకుని హత్య ?
ఈ ఘటనకు సంబంధించి ముగ్గురు వ్యక్తులను పోలీసులు అదుపులోకి తీసుకున్నట్టు తెలుస్తోంది. చింతకాని మండలం మత్కేపల్లి నామవరానికి చెందిన ఆటో డ్రైవర్ మోహన్రావుతో పాటు మరో ఇద్దరిని పోలీసులు ప్రశ్నిస్తున్నట్టు సమాచారం. మృతుడు జమాల్ సాహెబ్ సుతారి మేస్త్రీగా పనిచేస్తుండగా, ఆయన భార్య కూడా సుతారే. మోహన్ రావుతో మృతుడి భార్యకు వివాహేతర సంబంధం ఉన్న నేపథ్యంలో గతంలో ఒకట్రెండు సార్లు భార్యాభర్తల మధ్య గొడవలు జరిగాయని గ్రామస్తులు చెబుతున్నారు. మోహన్ రావు, జమాల్ సాహెబ్ మధ్య కూడా ఇటీవల గొడవ జరిగిందని, దీంతో జమాల్ సాహెబ్ ను చంపాలని మోహన్ రావు భావించాడని అనుకుంటున్నారు. నామవరంలో ఆర్ఎంపీగా పనిచేస్తున్న గోద వెంకటేశ్ దగ్గర సలహాలు తీసుకొని, మోహన్రావు, అతడి ఫ్రెండ్ నరిశెట్టి వెంకటేశ్తో కలిసి ఈ మర్డర్ చేసినట్టు ప్రచారం సాగుతోంది. కానీ పోలీసులు మాత్రం ఈ విషయాన్ని నిర్ధారించడం లేదు. మూడు బృందాలను ఏర్పాటు చేసి నిందితుల కోసం గాలిస్తున్నామని చెబుతున్నారు.
