నకిలీ వెండితో వ్యాపారులకు టోకరా

• ప్యూరిటీ సర్టిఫికెట్లతో నకిలీ కడ్డీలు అంటగట్టి.. అసలు వెండితో జంప్
• అంతరాష్ట్ర ముఠా అరెస్ట్
• 8.4 కిలోల వెండితోపాటు రూ. 1.5 లక్షల నగదు సీజ్

పద్మారావునగర్, వెలుగు: వెండి వ్యాపారులను నమ్మించి నకిలీ కడ్డీలు అంటగడుతున్న ఐదుగురు సభ్యుల అంతరాష్ట్ర ముఠాను మహంకాళి పోలీసులు అరెస్ట్ చేశారు. ఉత్తరప్రదేశ్, మధ్యప్రదేశ్​కు చెందిన ఈ ముఠా తొలుత వ్యాపారుల నమ్మకం పొందేందుకు ఒకటి రెండు సార్లు అసలు వెండిని ఇచ్చి లావాదేవీలు జరుపుతుంది.

ఆ నమ్మకంతోనే సికింద్రాబాద్ మహంకాళి స్ట్రీట్​కు చెందిన వ్యాపారి హీరాలాల్ వర్మకు నకిలీ ప్యూరిటీ సర్టిఫికెట్లతో 10 కిలోల వెండి కడ్డీలను ఇచ్చి, అందుకు బదులుగా రూ. 15 లక్షల విలువైన 6.35 కిలోల స్వచ్ఛమైన వెండిని తీసుకుని ఉడాయించారు. నిందితులు వెళ్లిన తర్వాత పరీక్షించగా, ఆ కడ్డీల్లో అసలు వెండి లేదని ( జీరో ప్యూరిటీ) తేలడంతో బాధితుడు పోలీసులను ఆశ్రయించారు.

రంగంలోకి దిగిన పోలీసులు టెక్నికల్ ఆధారాలతో ప్రధాన నిందితుడు హృదయేశ్ కుమార్​తో పాటు సుశీల్ కుమార్, ప్రిన్స్, రాజీవ్ జైన్, సోను కుష్వాహాను పట్టుకున్నారు. వీరి నుంచి 8.4 కిలోల వెండితోపాటు రూ. 1.5 లక్షల నగదు స్వాధీనం చేసుకున్నారు. దర్యాప్తులో ఈ ముఠా మహంకాళి పరిధిలో మరో 12.5 కిలోల వెండిని కాజేయడమే కాకుండా ఢిల్లీ, ఒడిశా వంటి ఇతర రాష్ట్రాల్లోనూ మోసాలకు పాల్పడినట్లు తేలింది. నిందితులను పట్టుకున్న ఇన్​స్పెక్టర్ రవికుమార్ బృందాన్ని డీసీపీ రక్షిత కృష్ణమూర్తి శనివారం అభినందించారు.