జనగామ, వెలుగు : జనగామ మున్సిపాలిటీ సాధారణ సమావేశం గురువారం రసాభాసగా సాగింది. పోడియంపై చైర్ పర్సన్ కడకంచి బాలమణి, కమిషనర్ మహేశ్వర్ రెడ్డి కూర్చున్నారు. దీంతో పోడియంపైకి వైస్ చైర్మన్ భూష పర్వతాలు ఆహ్వానించాలని బీఆర్ఎస్ మెంబర్లు కోరారు. అయితే రూల్స్ ఒప్పుకోవని కమిషనర్, చైర్ పర్సన్ స్పష్టం చేశారు. గడిచిన పదేండ్లలో మున్సిపాలిటీ సమావేశాల్లో వైస్ చైర్మన్ను గౌరవించారని, ఇప్పుడు కూడా ఇతర మున్సిపాలిటీల్లో గౌరవిస్తున్నందున ఇక్కడ కూడా పోడియంపైకి పిలవాల్సి ఉంటుందని బీఆర్ఎస్ కౌన్సిలర్లు డిమాండ్ చేసినా చైర్ పర్సన్ ఒప్పుకోలేదు. దీంతో బీఆర్ఎస్ కౌన్సిలర్లు పోడియంపైకి కుర్చీ తీసుకొని రాగా, వైస్ చైర్మన్ బూష పర్వతాలు కూర్చున్నారు.
పోలీసులు రంగప్రవేశం చేసి పోడియంపై నుంచి వైస్ చైర్మన్ను పక్కకు తప్పించారు. ఈ క్రమంలో కాంగ్రెస్, బీఆర్ఎస్ కౌన్సిలర్ల మధ్య తీవ్ర స్థాయిలో వాగ్వాదం జరిగింది. కమిషనర్ మహేశ్వర్రెడ్డి మాట్లాడుతూ రూల్ ప్రకారం చైర్ పర్సన్ లేని పక్షంలోనే వైస్ చైర్మన్ పోడియంపై కూర్చోవాల్సి ఉంటుందని, వైస్ చైర్మన్ కూర్చోవచ్చని ఏదైనా ఆధారం ఉంటే చూపాలని కోరారు. దీంతో బీఆర్ఎస్ కౌన్సిలర్లు పోడియం ఎదుట బైఠాయించి నిరసన వ్యక్తం చేశారు. కాంగ్రెస్, చైర్ పర్సన్కు వ్యతిరేకంగా నినాదాలు చేశారు. ఎలాంటి చర్చజరగకుండా మీటింగ్ వాయిదా పడింది.
