నా చావుకు ఎవరూ కారణం కాదని లెటర్
జేఎన్టీయూలో విద్యార్థి సంఘాల ఆందోళన
ఎల్బీనగర్, వెలుగు: ‘సారీ మమ్మీ.. డాడీ.. చెల్లి.. నా వల్ల అవడం లేదు. నా చావుకు ఎవరూ కారణం కాదు’ అని సూసైడ్లెటర్రాసి జేఎన్టీయూ బీటెక్స్టూడెంట్ఆత్మహత్య చేసుకుంది. మన్సూరాబాద్ డివిజన్ బాలాజీనగర్ లో ఉండే సుధాకర్, జ్యోతి భార్యాభర్తలు. వీరికి ఇద్దరు బిడ్డలు ఉండగా, పెద్ద బిడ్డ దివ్య(20) కూకట్ పల్లిలోని జేఎన్టీయూలో బీటెక్ సెకండియర్ చదువుతూ అక్కడే హాస్టల్ లో ఉంటోంది. ఈ నెల 26న మధ్యాహ్నం 2 గంటలకు దివ్య ఇంటికి వచ్చి తన కాళ్లు నొప్పిగా ఉన్నాయని తల్లికి చెప్పింది.
సాయంత్రం 4 గంటలకు చూడగా ఫ్యాన్ కు ఉరివేసుకుని కనిపించింది. ఈ ఘటనపై దివ్య తల్లి ఎల్బీనగర్ పోలీసులకు ఫిర్యాదు చేయగా, ఘటనాస్థలాన్ని పరిశీలించారు. దివ్య బెడ్ రూమ్లో సూసైడ్ లెటర్ను గుర్తించారు. జేఎన్టీయూ ఫ్యాకల్టీ పెట్టిన ఇబ్బందులు, వేధింపులతోనే తమ కూతురు ఆత్మహత్య చేసుకుందని తల్లిదండ్రులు ఆరోపిస్తున్నారు.
పూర్తి స్థాయిలో విచారణ చెయ్యాలి
దివ్య సూసైడ్ చేసుకోవడానికి యాజమాన్యానిదే బాధ్యతని శుక్రవారం క్యాంపస్లో పలు విద్యార్థి సంఘాల నాయకులు ఆందోళన చేపట్టారు. ఫ్యాకల్టీ హాజరు శాతం సరిపడ ఇవ్వకపోవడం వల్లనే మనస్తాపానికి గురై దివ్య సూసైడ్ చేసుకుందని ఆరోపించారు. అనారోగ్యం కారణంగానే తన హాజరు శాతం తక్కువ ఉందని అధ్యాపకులను కలిసి మొరపెట్టుకున్నా పట్టించుకోలేదన్నారు. క్యాంపస్లో బంద్ నిర్వహించి యాజమాన్యానికి నిరసనగా ర్యాలీ చేపట్టారు. అనంతరం అడ్మినిస్ట్రేషన్ బిల్డింగ్ ముందు బైఠాయించి ధర్నా చేశారు. దివ్య ఫోన్ను రికవరీ చేసి పూర్తి స్థాయి విచారణ జరపాలని డిమాండ్ చేశారు.
