ప్రస్తుతం టీ కొట్టులో టీ తాగినా, హోటల్‌లో భోజనం చేసినా, కిరాణా షాపులో సరుకులు కొన్నా చాలామంది క్యాష్ కంటే UPI పేమెంట్లకే ప్రాధాన్యత ఇస్తున్నారు. ఫోన్‌లో గూగుల్ పే, ఫోన్‌పే, పేటీఎం వంటి యాప్‌ల ద్వారా క్షణాల్లో డబ్బులు చెల్లిస్తున్నారు. అయితే, డిజిటల్ చెల్లింపులకు సంబంధించి దక్షిణ భారతదేశంలోని రెండు రాష్ట్రాల్లో వ్యాపారులు నిరసన వ్యక్తం చేస్తున్నారు. ముఖ్యంగా, UPI లావాదేవీలపై ఛార్జీల విషయంలో హోటళ్లు, రెస్టారెంట్లు, ఇతర వ్యాపారులు ఆందోళన చెందుతున్నారు.
ఈ నేపథ్యంలో కేరళలోని హోటళ్లు, రెస్టారెంట్లు అక్టోబర్ 15 నుంచి రూ.2,000 కంటే పైగా చేసే UPI పేమెంట్లను తీసుకోకూడదని యోచిస్తున్నాయి. ఇప్పటికే తమిళనాడులోని వ్యాపారులు అక్టోబర్ 12న ఒకరోజు పాటు UPI పేమెంట్లను బహిష్కరించాలని పిలుపునిచ్చారు. అయితే, ఈ నిరసనకు అన్ని ప్రాంతాల్లో ఒకే విధమైన స్పందన రాలేదు. కొన్ని దుకాణాలు డిజిటల్ పేమెంట్లను స్వీకరిస్తూనే ఉన్నాయి.
అక్టోబర్ 15 నుంచి
కేరళలోని హోటళ్లు, రెస్టారెంట్లు UPI చెల్లింపులపై ప్రతిపాదించిన కొత్త ఛార్జీలను వ్యతిరేకిస్తున్నాయి. ఈ ఛార్జీల వల్ల వ్యాపారులకు అదనపు ఖర్చు పెరుగుతుందని, డిజిటల్ చెల్లింపులను ప్రోత్సహించడానికి బదులుగా వాటిని నిరుత్సాహపరిచే పరిస్థితి ఏర్పడుతుందని హోటల్ యాజమాన్యాలు భావిస్తున్నాయి.
ఈ నేపథ్యంలో కేరళ హోటల్ అండ్ రెస్టారెంట్ అసోసియేషన్ అక్టోబర్ 15 నుంచి రూ.2,000 కంటే పైగా చేసే UPI చెల్లింపులను స్వీకరించకుండా ఉండే ప్రతిపాదనను ముందుకు తెచ్చింది.
అంటే, ఈ నిర్ణయం అమలులోకి వస్తే హోటల్‌లో భోజనం చేసిన తర్వాత బిల్లు రూ.2,000 దాటినప్పుడు UPI ద్వారా డబ్బులు చెల్లించేందుకు కస్టమర్లకు ఇబ్బంది ఎదురయ్యే అవకాశం ఉంటుంది. అలాంటి సందర్భాల్లో క్యాష్ లేదా అందుబాటులో ఉన్న ఇతర పేమెంట్ మార్గాలను ఉపయోగించాల్సి రావచ్చు.
UPI లావాదేవీలపై 0.4 శాతం ఛార్జీ
ఈ వివాదానికి కారణం రూ.2,000 కంటే పైగా ఒక వ్యక్తి నుంచి వ్యాపారికి జరిగే UPI లావాదేవీలపై 0.4 శాతం మర్చంట్ డిస్కౌంట్ రేట్ (MDR) ఛార్జీ విధించడం. MDR అంటే వ్యాపారులు డిజిటల్ చెల్లింపులను స్వీకరించడానికి సంబంధిత చెల్లింపు సేవల సంస్థలకు చెల్లించాల్సి వచ్చే చార్జీలు.
ఉదాహరణకు, రూ.5,000 విలువైన బిల్లుపై 0.4 శాతం ఛార్జీ వర్తిస్తే, ఆ మొత్తం రూ.20 అవుతుంది. అంటే, ప్రతిపాదిత రేటు ప్రకారం రూ.5,000 లావాదేవీకి రూ.20 ఛార్జీ పడే అవకాశం ఉంటుంది.
ఇలాంటి ఛార్జీలు అమలులోకి వస్తే రోజుకు చాల డిజిటల్ చెల్లింపులు స్వీకరించే హోటళ్లు, రెస్టారెంట్లు, ఇతర వ్యాపారులకు అదనపు ఖర్చు ఏర్పడుతుందని వ్యాపార సంఘాలు ఆందోళన చెందుతున్నాయి.
ముఖ్యంగా తక్కువ లాభాలతో వ్యాపారం చేసే చిన్న హోటళ్లు, రెస్టారెంట్లు, దుకాణాలపై ఈ ఖర్చు ప్రభావం చూపవచ్చని వారు భావిస్తున్నారు.
ఛార్జీ పరిమితి పెంచాలని డిమాండ్
ప్రతిపాదిత ఛార్జీలను పూర్తిగా ఉపసంహరించుకోవాలని కేరళ హోటల్ అండ్ రెస్టారెంట్ అసోసియేషన్ కోరుతోంది. ఒకవేళ ఛార్జీలను పూర్తిగా తొలగించడం సాధ్యం కాకపోతే, కనీసం రూ.10,000 కంటే ఎక్కువ విలువైన లావాదేవీలకు మాత్రమే వాటిని వర్తింపజేయాలని అసోసియేషన్ ప్రతినిధులు సూచిస్తున్నారు.
