Shubman Gill : భారత క్రికెట్ జట్టు కెప్టెన్ శుభ్‌మన్ గిల్ (Shubman Gill) తన అద్భుతమైన ఫామ్‌తో సరికొత్త చరిత్ర సృష్టించాడు. సెప్టెంబర్ 2026 నెలకు గానూ ఐసీసీ ప్రకటించిన ఐసీసీ మెన్స్ ప్లేయర్ ఆఫ్ ది మంత్ (ICC Men's Player of the Month) అవార్డును గిల్ కైవసం చేసుకున్నాడు. తోటి భారత ఆటగాడు అభిషేక్ శర్మ, జింబాబ్వే ఆల్‌రౌండర్ సికందర్ రజాలను వెనక్కి నెట్టి శుభ్‌మన్ గిల్ ఈ పురస్కారాన్ని దక్కించుకున్నట్లు ఈరోజు (అక్టోబర్ 13, మంగళవారం) ఐసీసీ అధికారికంగా ప్రకటించింది. ఈ అవార్డు గెలవడం శుభ్‌మన్ గిల్‌కు ఇది ఐదోసారి (5th Time) కావడం విశేషం. పురుషుల క్రికెట్ చరిత్రలోనే అత్యధిక సార్లు ఐసీసీ మంత్లీ అవార్డు గెలుచుకున్న ఏకైక క్రీడాకారుడిగా తన రికార్డును తనే తిరగరాశాడు.
గువాహటి, తిరువనంతపురంలలో పరుగుల సునామీ:
* సెప్టెంబర్ నెలలో వెస్టిండీస్‌తో జరిగిన వన్డే సిరీస్‌లోని మొదటి రెండు మ్యాచ్‌లలో గిల్ ఏకంగా 333 పరుగులు సాధించి ఊచకోత కోశాడు.
* తొలి వన్డే (తిరువనంతపురం): వెస్టిండీస్ విసిరిన 296 పరుగుల లక్ష్యాన్ని ఛేదించే క్రమంలో గిల్ 108 బంతుల్లో 110 పరుగులు సాధించి జట్టుకు ఘన విజయాన్ని అందించాడు.
* రెండో వన్డే (గువాహటి): విండీస్ నమోదు చేసిన 405/7 భారీ స్కోరును ఛేదిస్తూ గిల్ ప్రపంచ రికార్డు ఇన్నింగ్స్ ఆడాడు. కేవలం 133 బంతుల్లో 26 ఫోర్లు, 8 సిక్సర్లతో 223 పరుగులు (అజేయం) చేసి జట్టును గెలిపించాడు.
* చారిత్రాత్మక రికార్డులు: ఈ మ్యాచ్‌లో గిల్ కేవలం 62 బంతుల్లో సెంచరీ పూర్తి చేసి వన్డేల్లో వేగవంతమైన సెంచరీ చేసిన భారత కెప్టెన్‌గా నిలిచాడు. అంతేకాకుండా 117 బంతుల్లో డబుల్ సెంచరీ బాది వన్డే చరిత్రలోనే అత్యంత వేగవంతమైన ద్విశతకం సాధించిన ప్లేయర్‌గా చరిత్రకెక్కాడు. వన్డే ఛేజింగ్ చరిత్రలో ఒక బ్యాటర్ చేసిన అత్యధిక వ్యక్తిగత స్కోరు (223*) కూడా ఇదే కావడం గమనార్హం.
రికార్డుల రారాజు.. ఐదోసారి గిల్ సొంతం:
గతంలో జనవరి 2023, సెప్టెంబర్ 2023, ఫిబ్రవరి 2025, జూలై 2025లలో ఈ అవార్డు గెలుచుకున్న శుభ్‌మన్ గిల్, ఇప్పుడు 2026 సెప్టెంబర్ నెల అవార్డుతో ఐదోసారి విన్నర్‌గా నిలిచాడు. భారత్ తరఫున ఇప్పటి వరకు 11 మంది వేర్వేరు క్రీడాకారులు మొత్తం 17 సార్లు ఐసీసీ మంత్లీ అవార్డులు సాధించగా, అందులో గిల్ ఒక్కడే 5 సార్లు గెలుచుకోవడం విశేషం. గిల్ కంటే ముందు మార్చి 2026లో సంజు శాంసన్ ఈ అవార్డును అందుకున్నాడు.
అవార్డు గెలుపొందిన అనంతరం గిల్ స్పందన:
ఈ ప్రతిష్టాత్మక అవార్డును గెలుచుకోవడంపై శుభ్‌మన్ గిల్ మాట్లాడుతూ.. ఐదోసారి ఐసీసీ ప్లేయర్ ఆఫ్ ది మంత్ అవార్డును అందుకోవడం చాలా ఆనందంగా ఉందన్నాడు. సొంతగడ్డపై అభిమానుల సమక్షంలో భారీ లక్ష్యాలను ఛేదిస్తూ పరుగు సాధించడం నాకు ఎంతో సంతృప్తినిచ్చింది.. ప్రస్తుతం వన్డే క్రికెట్‌లో వేగం బాగా పెరిగింది. పిచ్ పరిస్థితులను త్వరగా అర్థం చేసుకుని ఆడటం చాలా ముఖ్యం, వచ్చే ఏడాది దక్షిణాఫ్రికాలో జరగనున్న ఐసీసీ వన్డే వరల్డ్ కప్ (World Cup 2027) ని దృష్టిలో పెట్టుకుని అత్యుత్తమ ప్రదర్శన కనబరిచే బలమైన జట్టును సిద్ధం చేస్తున్నామని గిల్ వెల్లడించాడు. అటు మహిళల క్రికెట్ లో షపాలీ వర్మ ఐసీసీ ప్లేయర్ ఆఫ్ ది మంత్ అవార్డును కైవసం చేసుకుంది.
India batting superstar becomes the first-ever five-time ICC Men's Player of the Month winner after a run-filled series against West Indies 🌟 Find out the winner ➡️ https://t.co/vfMePK59UQ https://t.co/LszB7cqD7C
— ICC (@ICC) October 13, 2026
