మహిళలకే పెద్దపీట!.. ఏడు మున్సిపాలిటీల్లో ఆరు మహిళలకు రిజర్వ్

ఖమ్మం మేయర్ కుర్చీ జనరల్ మహిళకు కేటాయింపు
కొత్తగూడెం తొలి కార్పొరేషన్ ఎస్టీ జనరల్
వార్డుల్లో సగం మహిళలకే రిజర్వ్

ఖమ్మం/భద్రాద్రికొత్తగూడెం, వెలుగు: ఉమ్మడి ఖమ్మం జిల్లాలో మున్సిపల్ పీఠాలను మహిళలే ఏలనున్నారు. జిల్లా పరిధిలోని మెజార్టీ చైర్ పర్సన్ స్థానాలను మహిళలకు రిజర్వ్ చేశారు.
ఖమ్మం జిల్లాలో ఉన్న ఏకైక మున్సిపల్ కార్పొరేషన్ ఖమ్మం మేయర్ను జనరల్మహిళకు కేటాయించగా, ఏదులాపురం చైర్ పర్సన్ ని ఎస్సీ మహిళకు, మధిర, సత్తుపల్లి, వైరా చైర్ పర్సన్ స్థానాలను జనరల్ మహిళకు రిజర్వ్ చేశారు. కల్లూరు మున్సిపల్ చైర్మన్ స్థానాన్ని మాత్రం ఎస్టీ జనరల్ కు కేటాయించారు. అన్ని మున్సిపాలిటీల్లోని వార్డుల్లో సగం స్థానాలను మహిళలకు కేటాయించారు. ఇక ఖమ్మం మేయర్ రిజర్వేషన్ ను ప్రకటించినా, డివిజన్ల రిజర్వేషన్లను మాత్రం ఇంకా ప్రకటించలేదు.

ప్రస్తుత పాలకవర్గానికి మే 7 వరకు గడువు ఉండడంతో పాటు, డివిజన్ల పునర్విభజన చేయాలని ఇప్పటికే ఆఫీసర్లు కసరత్తు చేస్తున్నారు. దీంతో ప్రస్తుతం ఉన్న 60 డివిజన్లకు అదనంగా 8 డివిజన్లు ఏర్పాటయ్యే అవకాశముంది.

ఈ ప్రాసెస్ తర్వాత డివిజన్ల రిజర్వేషన్లను ప్రకటించనున్నారు. కాగా, ప్రభుత్వ మార్గదర్శకాల మేరకు మున్సిపల్ వార్డులలో రిజర్వేషన్ కేటాయింపు ప్రక్రియ పారదర్శకంగా లాటరీ పద్ధతి ద్వారా పూర్తి చేశామని జిల్లా ఇన్చార్జి కలెక్టర్ డాక్టర్ పి. శ్రీజ తెలిపారు. భద్రాద్రికొత్తగూడెం జిల్లాలో తొలిసారి కార్పొరేషన్గా మారిన కొత్తగూడెం మేయర్ ను ఎస్టీ జనరల్కు కేటాయించినట్లు మున్సిపల్ శాఖ డైరెక్టర్ శ్రీదేవి వెల్లడించారు. కొత్తగూడెం కార్పొరేషన్లలోని డివిజన్లు, ఇల్లెందు, అశ్వారావుపేట మున్సిపల్ వార్డులను కలెక్టర్ జితేశ్ పాటిల్ ప్రకటించారు.

ఇల్లెందు మున్సిపల్ చైర్మన్ బీసీ మహిళగా, అశ్వారావుపేట మున్సిపల్ చైర్మన్ జనరల్ మహిళగా రిజర్వ్ అయ్యాయి. డివిజన్లు, వార్డుల రిజర్వేషన్లు తారు మారు కావడంతో పలువురు ముఖ్య నేతలకు ఆశా భంగం కలిగింది. తమకు అనుకూలంగా ఉండే వివిజన్ల వైపు దృష్టి సారిస్తున్నారు. జిల్లాలోని ఇల్లెందు, అశ్వారావుపేట మున్సిపాలిటీలు రెండూ మహిళలకే రిజర్వ్ కావడం విశేషం. అశ్వారావుపేట మున్సిపాలిటీలో తొలి సారిగా ఎన్నికలు జరుగుతున్నాయి.