- సీఎం, హోంమంత్రిగా ఉండి కూడా నేరాలు రెచ్చగొట్టేలా మాట్లాడ్తవా?: కేటీఆర్
హైదరాబాద్, వెలుగు: సీఎం రేంవంత్ రెడ్డి రెండేండ్లలోనే అట్టర్ఫ్లాప్ అయ్యాడని, తీవ్ర ప్రజావ్యతిరేకతను మూటగట్టుకున్నాడని బీఆర్ఎస్ వర్కింగ్ ప్రెసిడెంట్ కేటీఆర్ ఆరోపించారు. రేవంత్కు పూర్తిగా మతిభ్రమించిందని ఖమ్మం సభ సాక్షిగా తేలిపోయిందన్నారు. సోషల్ మీడియాలో చిన్న పోస్టు పెడితేనే కేసులు పెట్టి, అరెస్టులు చేసే పోలీసుశాఖ, డీజీపీ.. సీఎం చేసిన తీవ్ర వ్యాఖ్యలపై ఎందుకు చర్యలు తీసుకోవడం లేదని ఆదివారం ‘ఎక్స్’లో చేసిన పోస్ట్లో కేటీఆర్ప్రశ్నించారు.
‘‘సీఎంగానే కాకుండా.. హోంమంత్రిగా ఉన్నావనే సోయి కూడా లేకుండా బీఆర్ఎస్ జెండా గద్దెలను ధ్వంసం చేయాలంటావా? శాంతిభద్రతలను కాపాడాల్సిన రాజ్యాంగబద్ధమైన బాధ్యతను మరిచి, అసాంఘిక చర్యలను ప్రోత్సహించేలా మాట్లాడుతున్నవ్ నువ్వు సీఎంవా? ముఠా నాయకుడివా’’ అని పేర్కొన్నారు.
ఒక కాంగ్రెస్ సీఎంగా ఉండి.. టీడీపీ పాట పాడడం వెనకున్న అసలు కుట్ర తెలంగాణ సమాజానికి అర్థమైందన్నారు. రెండేళ్లుగా పాత బాస్ ఆదేశాల మేరకే తెలంగాణకు తీరని నష్టంచేసేలా జలహక్కులను కాలరాశారని తేలిపోయిందన్నారు. నీళ్ల నుంచి మొదలుకుని నిధులు, నియామకాల వరకూ తెలంగాణను పాతాళంలోకి నెట్టిన కోవర్టు రాజకీయాలకు, రాష్ట్రానికి చేసిన ద్రోహానికి సీఎం రేవంత్ భారీ మూల్యం చెల్లించుకోక తప్పదని హెచ్చరించారు.
