హైదరాబాద్, వెలుగు: కేటీఆర్ అబద్ధాల కోరు అని, ప్రజలను తప్పుదోవ పట్టిస్తున్నారని పీసీసీ సీనియర్ వైస్ ప్రెసిడెంట్ జి.నిరంజన్ విమర్శించారు. కాంగ్రెస్, బీజేపీ కుమ్మక్కవ్వడం వల్లే రెండు ఎమ్మెల్సీ స్థానాలకు వేర్వేరు నోటిఫికేషన్లు వచ్చాయని కేటీఆర్ అనడం పూర్తిగా అబద్ధమన్నారు. శనివారం ఆయన గాంధీభవన్లో మీడియాతో మాట్లాడారు. రాష్ట్రానికి రావాల్సిన నిధులు, వనరులు, అధికారుల కేటాయింపు కోసమే కేంద్ర మంత్రులతో సీఎం రేవంత్ రెడ్డి భేటీ అయ్యారని పేర్కొన్నారు.
గతంలోనూ ఎమ్మెల్సీ ఉప ఎన్నికలకు వేర్వేరుగా నోటిఫికేషన్ ఇచ్చారని, కోర్టులు కూడా ఆ విధానాన్ని సమర్థించాయని గుర్తు చేశారు. 2018లో అసెంబ్లీని రద్దు చేసి ఎన్నికలు ఎప్పుడు జరుగుతాయో కూడా నాటి సీఎం కేసీఆర్ మీడియాకు చెప్పారని, ఎన్నికల కమిషనర్తో మాట్లాడాకే ఆ విషయం చెప్తున్నానంటూ కేసీఆర్ అన్నారని గుర్తు చేశారు. ఎన్నికలకు సంబంధించిన అంతర్గత విషయాలు కేసీఆర్ లాంటి వారికే తెలుస్తాయన్నారు. కారు సర్వీసుకు మాత్రమే వెళ్లిందని కేటీఆర్ అంటున్నారని, అసలు కారు అనేది స్క్రాప్గా మారిందని ఎద్దేవా చేశారు.
