న్యూఢిల్లీ: ఎల్ అండ్ టీ సంస్థకు చెందిన మినరల్స్ అండ్ మెటల్స్ విభాగం మేజర్ ఆర్డర్లను దక్కించుకుంది. స్టీల్ అథారిటీ ఆఫ్ ఇండియా (సెయిల్) నుంచి దేశీయ మెటల్ రంగంలో ప్రాజెక్టుల కోసం ఈ ఒప్పందాలు జరిగాయి. ఎల్ అండ్ టీ లెక్కల ప్రకారం మేజర్ ఆర్డర్లు అంటే రూ.ఐదు వేల కోట్ల నుంచి రూ.10 వేల కోట్ల మధ్యలో ఉంటాయి.
పశ్చిమ బెంగాల్ లోని ఇస్కో స్టీల్ ప్లాంట్ సామర్థ్యాన్ని 2.5 మిలియన్ టన్స్ పర్ ఆనమ్ (ఎంటీపీఏ) నుంచి 6.5 ఎంటీపీఏకు పెంచే విస్తరణ పనుల్లో భాగంగా ఈ ఆర్డర్ లభించింది. ఇందులో కోక్ ఓవెన్ బ్యాటరీ, బై ప్రొడక్ట్ ప్లాంట్ వంటి కీలక విభాగాల నిర్మాణం ఉంటుంది. ఝార్ఖండ్ లోని బొకారో స్టీల్ ప్లాంట్ లో సింటర్ ప్లాంట్– 2 ఏర్పాటు బాధ్యత కూడా ఎల్ అండ్ టీ కి దక్కింది. క్లిష్టమైన ప్రాజెక్టులను నిర్ణీత సమయంలో పూర్తి చేయడంలో తమకున్న నైపుణ్యానికి ఈ ఆర్డర్లు నిదర్శనమని సంస్థ ప్రతినిధులు తెలిపారు.
