ఓయూ,వెలుగు: రాజ్యాంగ మౌలిక సూత్రాలకు వ్యతిరేకంగా తీసుకొచ్చిన జాతీయ విద్యా విధానం–-2020లో అనేక లోపాలు ఉన్నాయని, లోపభూయిష్టమైన విద్యా విధానాన్ని ప్రజలందరూ తిరస్కరించాలని ఓయూ ప్రొఫెసర్ కాసీం, ఏఐఎస్ఎఫ్కార్యదర్శి పుట్ట లక్ష్మణ్ పిలుపునిచ్చారు. విద్యా కాషాయీకరణ, ప్రైవేటీకరణ కోసమే నూతన విద్యా విధానం ఉందని ఆరోపించారు. ఏఐఎస్ఎఫ్రాష్ట్ర కౌన్సిల్ ఆధ్వర్యంలో ఓయూ ఆర్ట్స్ కాలేజీ వద్ద నూతన జాతీయ విద్యా విధానం రద్దు చేయాలని డిమాండ్ చేస్తూ మంగళవారం సంతకాల సేకరణ చేపట్టారు.
ఈ సందర్భంగా వారు మాట్లాడుతూ.. ప్రభుత్వ విద్యను పూర్తిగా నిర్వీర్యం చేసి పేద, మధ్య తరగతి వర్గాలకు ఉన్నత విద్యను దూరం చేసే కుట్ర అమలు చేస్తున్నారని ఆరోపించారు. అందులో భాగంగానే కేంద్రం నూతన జాతీయ విద్యావిధానం- తీసుకొచ్చిందని విమర్శించారు. 90శాతం విద్యార్థులు నాణ్యమైన విద్య పొందే హక్కును కోల్పోతారని, విద్యా వ్యాపారీకరణతో ఎస్సీ, ఎస్టీ, ఓబీసీ, మైనారిటీలకు సామాజిక న్యాయం దూరం చేస్తూ, రాష్ట్రాల హక్కులను కాలరాసే విధంగా ఉందని మండిపడ్డారు. ఏఐఎస్ఎఫ్నేతలు మణికంఠ రెడ్డి, గ్యార నరేష్, గ్యార క్రాంతి, నెల్లి సత్య, రెహమాన్ తదితరులు పాల్గొన్నారు.
