చిన్నప్పుడు చూసిన, విన్న విషయాలు పిల్లల్ని చాలా ప్రభావితం చేస్తాయి. అందుకు ఉదాహరణ... ఈ 17 ఏండ్ల అబ్బాయి. పేరు బెంజమిన్ చోయ్. అమెరికాలోని వర్జీనియాలో ఉంటాడు. చిన్నప్పుడు ఒక డాక్యుమెంటరీలో రోబోటిక్ హ్యాండ్ని చూశాడు. అందులో చూపించిన ప్రోస్తటిక్ టెక్నాలజీ అతనికి చాలా కొత్తగా అనిపించింది. దాంతో తను కూడా అలాంటి చేతిని తయారుచేయాలి అనుకున్నాడు. అనుకున్నట్టుగానే.. బ్రెయిన్ సర్జరీ చేయాల్సిన అవసరం లేకుండానే మెదడు ఆదేశాలతో పనిచేసే ప్రోస్తటిక్ హ్యాండ్ డిజైన్ చేశాడు. థర్డ్గ్రేడ్ చదువుతున్నప్పుడు ‘‘60 మినిట్స్’ అనే డాక్యుమెంటరీ చూశాడు బెంజమిన్. అందులో రోబోటిక్ హ్యాండ్ ఉన్న వ్యక్తి మెదడులోని సెరిబ్రమ్లో చిన్న సెన్సర్ పెడతారు రీసెర్చర్లు. ఆ కాన్సెప్ట్ బెంజమిన్కు చాలా నచ్చింది. “కృత్రిమంగా శరీర భాగాల్ని తయారుచేసి, అమర్చే టెక్నాలజీ చూసి చాలా ఆశ్చర్యం వేసింది. అయితే, సెన్సర్ పెట్టడం కోసం బ్రెయిన్ సర్జరీ చేయడం అనేది చాలా రిస్క్. అన్నిసార్లూ సక్సెస్ కాదు. సర్జరీకి వేల డాలర్లు కావాలి. అలాకాకుండా సర్జరీ అవసరం లేకుండా మెదడు ఆదేశాలతో పనిచేసే ప్రొస్తెటిక్ హ్యాండ్ తయారుచేయాలి” అనిపించేది బెంజమిన్కు. అందుకని కంప్యూటర్ లాంగ్వేజ్, అల్గారిథమ్, ఆర్టిఫిషియల్ ఇంటెలిజెన్స్ మీద పట్టు పెంచుకోవాలి అనుకున్నాడు. తొమ్మిదో క్లాస్లో ఒక కంప్యూటర్ ప్రోగ్రామింగ్ వెబ్సైట్లో వీడియోలు చూసి పైతాన్, సి++ లాంగ్వేజ్లు నేర్చుకున్నాడు.
లాక్డౌన్లో టైం దొరికింది
ఇప్పుడు బెంజమిన్ పదో క్లాస్ చదువుతున్నాడు. వేసవి సెలవుల్లో అల్యూమినియం ఫ్యూయెల్ మీద రీసెర్చ్ చేయాలి అనుకున్నాడు. కానీ, అంతలోనే లాక్డౌన్ అవ్వడంతో ఆ ల్యాబ్ మూతపడింది. ఆ టైంలో ఏం చేయాలని ఆలోచిస్తుంటే... చిన్నప్పుడు చూసిన డాక్యుమెంటరీ గుర్తుకొచ్చింది. అంతే.. ప్రోస్తటిక్ హ్యాండ్ తయారుచేయాలని అనుకున్నాడు. అందుకోసం తాను టేబుల్ టెన్నిస్ ఆడే టేబుల్నే ల్యాబ్గా మార్చుకున్నాడు బెంజమిన్. స్కూల్లో జరిగే రోబోటిక్స్ తయారీ, కోడింగ్ పోటీల్లో పాల్గొన్న ఎక్స్పీరియెన్స్ కూడా అతనికి ఉపయోగపడింది.
75 డిజైన్ల తర్వాత...
తన సిస్టర్ దగ్గర 3–డి ప్రింటర్, చేపల్ని పట్టేందుకు ఉపయోగించే గాలం తీగ సాయంతో రోబోటిక్ హ్యాండ్ తయారుచేశాడు. అయితే, ఆ 3–డి ప్రింటర్తో4.75 ఇంచుల చేతిని మాత్రమే ప్రింట్ చేయొచ్చు. దాంతో, చేతిని చిన్న భాగాలుగా ప్రింట్ చేశాడు. నట్లు, రబ్బర్ బ్యాండ్తో వాటిని జతచేసి, పెద్ద చేతిని తయారుచేశాడు బెంజమిన్. అందుకోసం 30 గంటలు కష్టపడ్డాడు. అయితే, 75 డిజైన్ల తర్వాతే మైండ్ కంట్రోల్డ్ ప్రోస్తటిక్ హ్యాండ్ సాధ్యమైంది. దీని తయారీ గురించిన సమాచారాన్ని ఇంటర్నెట్లో కూడా పెట్టాడు.
ఎలా పనిచేస్తుందంటే...
ఆర్టిఫీషియల్ ఇంటెలిజెన్స్ ద్వారా పనిచేసే అల్గారిథం సాయంతో ఈ ప్రొస్తెటిక్ హ్యాండ్ కదులుతుంది. ఎలక్ట్రోఎన్సెఫలోగ్రఫీ (ఇఇజి)ని కూడా ఉపయోగించుకుంటుంది. ఈ చేతిలో ఉన్న సెన్సర్ల సాయంతో ఇఇజి డివైజ్ మెదడు తరంగాల్ని రికార్డ్ చేస్తుంది. ఈ చేయి నాలుగు టన్నుల బరువు మోయగలదు. ధర మూడొందల డాలర్లు. ఈ ఇన్నొవేషన్తో ఈ ఏడాది ‘రీజెనెరన్ సైన్స్ టాలెంట్ సెర్చ్’లోని 40 మంది ఫైనలిస్ట్ల్లో చోటు దక్కించుకు న్నాడు బెంజమిన్. అమెరికాలో హైస్కూల్ స్టూడెంట్స్ పాల్గొనే ముఖ్య మైన సైన్స్, మ్యాథ్స్ కాంపిటీషన్ ఇది.
