నెక్కొండ/ రాయపర్తి, వెలుగు: వరంగల్ జిల్లా నెక్కొండ, రాయపర్తి మండల కేంద్రాల్లో గురువారం మొక్కజొన్న రైతులు పంటను వెంటనే కొనుగోలు చేయాలని డిమాండ్ చేస్తూ ఆందోళన చేపట్టారు. నెక్కొండలో నర్సంపేట ప్రధాన రహదారిపై, రాయపర్తిలో వరంగల్– ఖమ్మం హైవేపై బైఠాయించి ధర్నా చేశారు.
కొనుగోలు కేంద్రాలకు పంటను తీసుకువచ్చి రోజులు గడుస్తున్నా కాంటాలు కావడం లేదని ఆవేదన వ్యక్తం చేశారు. గన్నీ బ్యాగులు ఇవ్వడం లేదని అన్నారు. ట్రాఫిక్ జామ్ కావడంతో పోలీసులు వారితో మాట్లాడి ధర్నాను విరమింపజేశారు.
