- పోలీసులకు, ప్రజలకు మధ్య వారధిగా సెల్ఫ్ హెల్ప్గ్రూపులకు సీపీ సుమతి శ్రీకారం
మల్కాజ్ గిరి, వెలుగు: మహిళల భద్రత, వారిపై జరుగుతున్న నేరాల నివారణకు మల్కాజిగిరి పోలీస్ కమిషనరేట్ ఒక వినూత్న కార్యక్రమాన్ని తీసుకురాబోతున్నది. ‘మీ సురక్ష - సహచరి’ పేరుతో రూపొందించిన కమ్యూనిటీ పోలీసింగ్ పథకాన్ని మంగళవారం కమిషనర్ సుమతి ప్రారంభించనున్నారు. స్వయం సహాయక బృందాల మహిళల ద్వారా పోలీసు వ్యవస్థకు, ప్రజలకు మధ్య అనుబంధాన్ని మరింత బలోపేతం చేయడమే ఈ స్కీం ముఖ్య ఉద్దేశం. ఇందులో భాగంగా మల్కాజిగిరి జోన్ పరిధిలోని బోయిన్పల్లిలోని ఇంపీరియల్ గార్డెన్లో , ఎల్బీ నగర్, ఉప్పల్ జోన్లకు సంబంధించి నాగోల్శుభం కన్వెన్షన్ సెంటర్లో మధ్యాహ్నం కార్యక్రమం నిర్వహించనున్నారు.
3,195 మంది సేఫ్టీ అంబాసిడర్లు
‘మీ సురక్ష - సహచరి’ లో భాగంగా తొలి దశలో 3,195 మంది స్వయం సహాయక సంఘ మహిళలను కమ్యూనిటీ సేఫ్టీ అంబాసిడర్లుగా తయారు చేయనున్నారు. వీరికి మహిళలు, పిల్లల భద్రత, సైబర్ నేరాలపై జాగ్రత్తలు, డ్రగ్స్నివారణ, రోడ్డు భద్రత, న్యాయపరమైన హక్కులపై శిక్షణ ఇస్తారు. వీరు కమిషనరేట్ పరిధిలో మిగతా 2.70 లక్షల మంది సెల్ఫ్హెల్ప్గ్రూపులకు అవగాహన కల్పించే బాధ్యత తీసుకుంటారు. శిక్షణలో భాగంగా సెల్ఫ్హెల్ప్గ్రూపు మహిళలు పోలీస్ స్టేషన్లు, భరోసా కేంద్రాలు, డబ్ల్యూడీసీడబ్ల్యూ కేంద్రాలను విజిట్చేసి పోలీసు సేవల పనితీరును ప్రత్యక్షంగా పరిశీలిస్తారు.
