- నైజీరియాలో 317 మంది స్కూలు పిల్లల కిడ్నాప్
- అర్ధరాత్రి స్కూల్పై మిలిటెంట్ల దాడి
అబుజా (నైజీరియా): నైజీరియాలో ఓ స్కూల్ పై దాడి చేసిన మిలిటెంట్లు 317 మంది పిల్లలను కిడ్నాప్ చేసిన ఘటన కలకలం రేపింది. జమ్ఫారా స్టేట్లోని జంగెబె టౌన్లో ఈ ఘటన జరిగింది. గవర్నమెంట్ గర్ల్స్ స్కూల్పై అర్ధరాత్రి గుర్తుతెలియని గన్ మెన్లు దాడి చేసి పిల్లలను కిడ్నాప్ చేశారని స్టేట్ ఇన్ఫర్మేషన్ కమిషనర్ చెప్పారు. వారంలో ఇది రెండో కిడ్నాప్ ఘటన అని తెలిపారు. పిల్లల ఆచూకీ కోసం సెక్యూరిటీ బలగాలు గాలిస్తున్నట్టు వెల్లడించారు. ‘అర్ధరాత్రి మిలిటెంట్లు స్కూల్పై దాడి చేశారు. పిల్లలను బలవంతంగా వెహికల్స్లోకి ఎక్కించారు. మరికొందరు పిల్లలను నడిపించుకుంటూ తీసుకెళ్లారు’ అని ప్రత్యక్ష సాక్షులు తెలిపారు. కొందరు గవర్నమెంట్ సెక్యూరిటీ ఫోర్సెస్ యూనిఫాంలో ఉన్నట్టు స్కూల్ టీచర్ ఒకరు చెప్పారు. స్కూల్లో మొత్తం 421 మంది స్టూడెంట్స్ ఉంటే.. కిడ్నాప్ తర్వాత 55 మంది మిగిలారని తెలిపారు. కిడ్నాప్ విషయం తెలుసుకున్న పేరెంట్స్ స్కూల్ దగ్గరకు చేరుకుని.. తమ పిల్లలను కాపాడాలని డిమాండ్ చేశారు.