ఎమర్జెన్సీ డిపార్ట్మెంట్ల మధ్య సమన్వయం ఉండాలి : మంత్రి దామోదర

• పేషెంట్ల విషయంలో డ్యూటీ డాక్టర్లు, ఆర్‌‌‌‌‌‌‌‌ఎంవోల నిర్లక్ష్యం సహించం: మంత్రి దామోదర
• చికిత్స మధ్యలో ఆపేస్తున్న ప్రైవేట్ ఆసుపత్రులపై కఠిన చర్యలకు ఆదేశం
• నిమ్స్ ఆసుపత్రిపై మంత్రి రివ్యూ మీటింగ్

హైదరాబాద్, వెలుగు: గాంధీ, ఉస్మానియా, నిమ్స్, ఇతర ప్రభుత్వ హాస్పిటళ్ల ఎమర్జన్సీ డిపార్ట్‌‌‌‌‌‌‌‌మెంట్ల మధ్య కోఆర్డినేషన్ ఉండాలని, ఒక హాస్పిటల్‌‌‌‌‌‌‌‌ ఎమర్జెన్సీ వార్డులో బెడ్లు ఫుల్​అయినప్పుడు పేషెంట్‌‌‌‌‌‌‌‌ను మరో హాస్పిటల్‌‌‌‌‌‌‌‌కు రిఫర్ చేసి అక్కడ చేర్చుకునేలా చర్యలు తీసుకోవాలని వైద్య ఆరోగ్య శాఖ మంత్రి దామోదర రాజనర్సింహ అధికారులను ఆదేశించారు. పేషెంట్‌‌‌‌‌‌‌‌ను రిఫర్ చేయడానికి ముందే అవసరమైన ప్రాథమిక చికిత్స అందించి, స్టేబుల్ చేయాలని సూచించారు. 

నిమ్స్‌‌‌‌‌‌‌‌లో పేషెంట్లకు అందుతున్న వైద్య సేవలపై మంత్రి హైదరాబాద్‌‌‌‌‌‌‌‌లోని ఆరోగ్యశ్రీ ట్రస్ట్ ఆఫీసులో నిమ్స్ డైరెక్టర్ బీరప్ప, ఇతర ఉన్నతాధికారులతో రివ్యూ చేశారు. ఈ సందర్భంగా దామోదర మాట్లాడుతూ.. అత్యవసర పరిస్థితుల్లో నిమ్స్‌‌‌‌‌‌‌‌కు వస్తున్న పేషెంట్ల విషయంలో మరింత అప్రమత్తంగా వ్యవహరించాలని సూచించారు. పేషెంట్ల అడ్మిషన్, రిఫరల్ విషయంలో డ్యూటీ డాక్టర్లు, ఆర్‌‌‌‌‌‌‌‌ఎంవోలు నిర్లక్ష్యం వహిస్తే కఠిన చర్యలు తీసుకుంటామని హెచ్చరించారు.

నిమ్స్​కు రోజు 80 ఎమర్జెన్సీ కేసులు 

ప్రస్తుతం నిమ్స్ ఎమర్జెన్సీకి రోజుకు 80 నుంచి వంద మంది పేషెంట్లు వస్తున్నారని బీరప్ప తెలిపారు. ఇందులో సగం మందికిపైగా పేషెంట్లు ప్రైవేటు, కార్పొరేట్ హాస్పిటల్స్‌‌‌‌‌‌‌‌లో చికిత్స పొంది, పరిస్థితి విషమించాక చివరి నిమిషంలో నిమ్స్‌‌‌‌‌‌‌‌కు వస్తున్నారని వెల్లడించారు. కొన్ని కార్పొరేట్ హాస్పిటల్స్‌‌‌‌‌‌‌‌ ఆపరేషన్లు చేసి, పేషెంట్లు పూర్తిగా కోలుకోకముందే వారిని డిశ్చార్జ్ చేసి, నిమ్స్‌‌‌‌‌‌‌‌, ఉస్మానియా, గాంధీ హాస్పిటల్స్‌‌‌‌‌‌‌‌కు పంపిస్తున్నాయని తెలిపారు.

 ఎమర్జెన్సీకి వచ్చే పేషెంట్లలో నేరుగా నిమ్స్‌‌‌‌‌‌‌‌కు వచ్చే వారికి, ప్రభుత్వ హాస్పిటల్స్ నుంచి రిఫరల్‌‌‌‌‌‌‌‌పై వచ్చే వారికి అధిక ప్రాధాన్యత ఇవ్వాలన్నారు. ఆపరేషన్ల తర్వాత, చికిత్స మధ్యలో పేషెంట్లను డిశ్చార్జ్ చేస్తున్న ప్రైవేట్, కార్పొరేట్ హాస్పిటల్స్‌‌‌‌‌‌‌‌పై కఠిన చర్యలు తీసుకోవాలని ఆరోగ్యశాఖ అధికారులను మంత్రి ఆదేశించారు.

వంద కిడ్నీ ట్రాన్స్ ప్లాంట్ లు...

నిమ్స్‌‌‌‌‌‌‌‌లో జనవరి నుంచి జులై వరకు 5 లక్షల 44 వేల మందికి వైద్య సేవలు అందించామని బీరప్ప మంత్రికి వివరించారు. ఈ‌‌‌‌‌‌‌‌ ఏడాది ఇప్పటికే వందకుపైగా కిడ్నీ ట్రాన్స్‌‌‌‌‌‌‌‌ప్లాంటేషన్ సర్జరీలు కూడా చేశామని వెల్లడించారు. ఈ సందర్భంగా నిమ్స్ డైరెక్టర్, డాక్టర్లు, సిబ్బందిని మంత్రి అభినందించారు.