- కేసీఆర్ దీక్ష సంగతి నిమ్మరసానికి తెలుసు: మంత్రి సీతక్క
- నాడు ఒక్కరోజు మాత్రమే దీక్షా దివస్.. ఇప్పుడు 10 రోజులా?
- అధికార పార్టీని దూషించడం కోసమే నిర్వహిస్తున్నారా?
- సోషల్ మీడియాను బీఆర్ఎస్ తప్పుడు ప్రచారానికి వాడుకుంటున్నది
- బీసీ అని చెప్పుకునే ప్రధాని మోదీ..బీసీ రిజర్వేషన్ల పెంపుపై నిర్ణయం తీసుకోవాలి
- బీజేపీ, బీఆర్ఎస్ కలిసి బీసీలను మోసం చేస్తున్నాయని ఫైర్
హైద‌రాబాద్, వెలుగు: అధికారం పోగానే ఫామ్‌హౌస్‌కే పరిమితమయ్యే నేతలు.. ఎప్పటికీ ప్రజానాయకులు కాలేరని మంత్రి సీతక్క అన్నారు. కేసీఆర్దీక్ష సంగతి ఆయన తాగిన నిమ్మరసానికి తెలుసని ఎద్దేవా చేశారు. సోషల్ మీడియాను బీఆర్ఎస్ తప్పుడు ప్రచారానికి వాడుకుంటున్నదని, మీడియా అనే ఫోర్త్ ఎస్టేట్‌ను సొంత ఎస్టేట్‌లా మార్చుకుని విషం చిమ్ముతున్నదని మండిపడ్డారు. సోనియాగాంధీ దయ వల్ల ఏర్పడిన తెలంగాణలో బీఆర్ఎస్ అన్ని వర్గాలను వంచించిందని, ఉద్యోగాలు లేక యువత.. అప్పుల బాధతో రైతులు ఆత్మహత్యలకు పాల్పడే పరిస్థితి తెచ్చిందని విమర్శించారు. కరోనా చికిత్సను ఆరోగ్యశ్రీలో చేర్చాలన్న డిమాండ్‌తో ఇందిరా పార్క్ వద్ద చేపట్టిన నిరాహార దీక్షకు సంబంధించి నమోదైన కేసులో శనివారం విచారణ నిమిత్తం నాంపల్లి ప్రజాప్రతినిధుల కోర్టుకు మంత్రి సీతక్క హాజరయ్యారు. అనంతరం ఆమె మీడియాతో మాట్లాడారు. తనతోపాటు అప్పటి ఎన్ఎస్యూఐ అధ్యక్షుడు, ప్రస్తుత ఎమ్మెల్సీ బల్మూరి వెంకట్ తదితరులపై కేసు నమోదైనట్లు తెలిపారు. ఈ కేసు విషయంలో న్యాయమూర్తి ముందు హాజరు కాగా, తదుపరి విచారణను కోర్టు డిసెంబర్ 18కి వాయిదా వేసినట్లు మంత్రి తెలిపారు.
దీక్షాదివస్ పేరుతో మరోసారి మోసం..
‘దీక్షా దివస్’ పేరుతో ప్రజలను మళ్లీ మోసం చేయడానికి బీఆర్ఎస్ డ్రామాలాడుతున్నదని మంత్రి సీతక్క అన్నారు. అధికారంలో ఉన్నప్పుడు దీక్షా దివస్ ఒక్క రోజుకే పరిమితం చేశారని, ఇప్పుడు అధికారం పోయాక 10 రోజులు నిర్వహించడం వెన‌క ఆంత‌ర్యం ఏమిటని ప్రశ్నించారు. అధికార పార్టీని దూషించడం కోసంమే దీక్షా దివస్ నిర్వహిస్తున్నారా? అని నిల‌దీశారు. ప్రజా ప్రభుత్వానికి రెండేండ్లు పూర్తయిందని, రాష్ట్రవ్యాప్తంగా తొమ్మిది రోజుల విజయోత్సవాలు నిర్వహిస్తున్నామన్నారు. తమ ప్రభుత్వం చేపట్టిన ఎన్నో పనులు ప్రజల్లో నమ్మకాన్ని పెంచాయని చెప్పారు. తమ వ్యక్తిత్వాన్ని కించపరుస్తూ బీఆర్ఎస్ తప్పుడు ప్రచారం చేస్తున్నదని, జూబ్లీహిల్స్ ఉప ఎన్నికలో ప్రజలు బీఆర్ఎస్ తప్పుడు ప్రచారాన్ని తిప్పికొట్టారని, అయినా వారి బుద్ధి మారలేదని అన్నారు.
రిజర్వేషన్లపై బీజేపీ, బీఆర్ఎస్ కుట్రలు
బీసీ రిజర్వేషన్ల పెంపు కోసం స్థానిక ఎన్నికలను రెండేండ్లు వాయిదా వేయాల్సి వచ్చిందని, 15వ ఆర్థిక సంఘం నిధులు రూ.3వేల కోట్లు ఆలస్యం అవుతున్నాయని మంత్రి సీతక్క తెలిపారు. మార్చి 31తో ఆర్థిక సంఘం గడువు ముగియనున్నదని, ఎన్నికలు జరపకపోతే రాష్ట్రానికి నష్టం తప్పదని పేర్కొన్నారు. రిజర్వేషన్ల పెంపుకోసం అవసరమైన అన్ని ప్రక్రియలు పూర్తయ్యాయని, బీజేపీ, బీఆర్ఎస్ కలిసి కుట్రలు చేస్తున్నాయన్నారు. కులగణనలో బీఆర్ఎస్ పెద్దలు పాల్గొనకపోవడం దీనికి నిదర్శనమని చెప్పారు. రిజర్వేషన్లను రద్దు చేస్తామని చెప్పే బీజేపీ నాయకులు, బీసీ రిజర్వేషన్ల పెంపు కోసం దొంగ దీక్షలు చేస్తుండటం హాస్యాస్పదంగా ఉందన్నారు. రిజర్వేషన్ పెంపు ఢిల్లీలో పెండింగ్‌లో ఉందని, ప్రధాని మోదీ బీసీ అయితే వెంటనే నిర్ణయం తీసుకోవాలని మంత్రి సీతక్క డిమాండ్ చేశారు. రిజర్వేషన్ల పెంపుపై కేంద్రం ఆలస్యం చేస్తున్నందున, పార్టీపరంగా బీసీలకు 42 శాతం సీట్లను కేటాయిస్తామని చెప్పారు.
