దీపావళి పండుగకు హిందూ సంప్రదాయంలో ప్రత్యేక ప్రాధాన్యత ఉంది. ఈ పర్వదినం సందర్భంగా సంపద, ఐశ్వర్యానికి అధిదేవత అయిన లక్ష్మీదేవిని భక్తిశ్రద్ధలతో పూజిస్తారు. రేపు ( నవంబర్ 8 )ఆదివారం దీపావళి పండుగ జరుపుకోనున్నారు. ఈ సందర్భంగా లక్ష్మీ పూజకు సంబంధించి శుభ ముహూర్తాలు, అమావాస్య తిథి, పూజా విధానం గురించి తెలుసుకుందాం.
దీపావళి 2026 లక్ష్మీ పూజ ముహూర్తం.. నగరాల వారీగా సమయాలు
దీపావళి రోజున లక్ష్మీ పూజను సాధారణంగా సాయంత్రం ప్రదోష కాలంలో నిర్వహిస్తారు. అయితే సూర్యాస్తమయ సమయాలు, స్థానిక జ్యోతిష్య గణనల్లో తేడాల కారణంగా నగరాలను బట్టి పూజ ముహూర్తాలు మారుతుంటాయి.
- హైదరాబాద్ : సాయంత్రం 6:07 నుంచి రాత్రి 8: 08 వరకు
- ఢిల్లీ: సాయంత్రం 5:54 నుంచి రాత్రి 7:50 గంటల వరకు.
- ముంబై: సాయంత్రం 6:27 నుంచి రాత్రి 8:27 గంటల వరకు.
- కోల్‌కతా: సాయంత్రం 5:20 గంటలకు శుభ ముహూర్తం ప్రారంభం.
ప్రాంతాలను బట్టి ఈ సమయాల్లో ఒకటి లేదా రెండు నిమిషాల తేడా ఉండవచ్చు. అందువల్ల భక్తులు తమ నగరానికి సంబంధించిన స్థానిక పంచాంగాన్ని పరిశీలించి పూజా సమయాన్ని నిర్ణయించుకోవాలి.
దీపావళి 2026 అమావాస్య తిథి ఎప్పటి నుంచి ఎప్పటి వరకు?
దీపావళి పండుగ కార్తీక అమావాస్య రోజున జరుపుకుంటారు. లక్ష్మీ పూజకు ఈ తిథికి ఎంతో ప్రాధాన్యత ఉంది.2026 నవంబర్ 8వ తేదీ ఉదయం 11:27 గంటలకు అమావాస్య తిథి ప్రారంభమై, నవంబర్ 9వ తేదీ మధ్యాహ్నం 12:31 గంటలకు ముగుస్తుంది.చంద్రుడి గమనాన్ని ఆధారంగా చేసుకుని తిథులను లెక్కిస్తారు. అందువల్ల ఒక తిథి అర్ధరాత్రి సమయంలోనే ప్రారంభం కావాల్సిన అవసరం లేదు. ఒక క్యాలెండర్ తేదీలో ప్రారంభమై మరుసటి తేదీ వరకు కొనసాగవచ్చు.
దీపావళి లక్ష్మీ పూజకు కావాల్సిన సామగ్రి ఏమిటి?
లక్ష్మీ పూజకు ముందుగా ఇంటిని శుభ్రం చేసుకుని, పూజా మందిరాన్ని అందంగా అలంకరించుకోవాలి. లక్ష్మీదేవి, వినాయకుడి విగ్రహాలు లేదా చిత్రపటాలను పూజా స్థలంలో ఏర్పాటు చేసుకోవాలి.
- పూజకు అవసరమైన ప్రధాన సామగ్రి:
- ప్రమిదలు, పత్తి వత్తులు
- నెయ్యి లేదా నూనె
- పూలు, పండ్లు
- రోలీ, కుంకుమ, అక్షింతలు
- అగరబత్తులు, ధూపం
- స్వీట్లు, నైవేద్యం
- నీరు, నాణేలు
కొన్ని కుటుంబాల్లో పూజ సమయంలో నాణేలు, నగదు, వ్యాపార ఖాతా పుస్తకాలను కూడా ఉంచి లక్ష్మీదేవిని ఆరాధించడం సంప్రదాయంగా వస్తోంది.
దీపావళి రోజున లక్ష్మీదేవిని ఎందుకు పూజిస్తారు?
లక్ష్మీదేవిని సంపద, ఐశ్వర్యం, శ్రేయస్సు, సౌభాగ్యానికి ప్రతీకగా భావిస్తారు. దీపావళి రోజున అమ్మవారిని పూజించడం వల్ల ఆర్థిక స్థిరత్వం, కుటుంబంలో సుఖసంతోషాలు, ప్రశాంతత లభిస్తాయని భక్తుల నమ్మకం.చాలా కుటుంబాల్లో లక్ష్మీదేవితో పాటు వినాయకుడిని కూడా పూజిస్తారు. వినాయకుడు జ్ఞానానికి, శుభారంభాలకు ప్రతీక. విఘ్నాలను తొలగించే దేవుడిగా ఆయనను ఆరాధిస్తారు.లక్ష్మీదేవి, వినాయకుడిని కలిపి పూజించడం ద్వారా సంపదతో పాటు జ్ఞానం, విజయం, శుభం కలగాలని భక్తులు ప్రార్థిస్తారు. దీపాలు వెలిగించడం, పూలు సమర్పించడం, ప్రార్థనలు చేయడం ద్వారా కుటుంబ సభ్యులు కృతజ్ఞతను తెలియజేస్తూ కొత్త ఏడాదికి శుభారంభం కోరుకుంటారు.
నిర్ణీత ముహూర్తంలో లక్ష్మీ పూజ చేయలేకపోతే ఏం చేయాలి?
కొన్నిసార్లు ఉద్యోగ బాధ్యతలు, కుటుంబ పనులు, ఇతర అనివార్య కారణాల వల్ల నిర్ణయించిన శుభ ముహూర్తంలో లక్ష్మీ పూజ చేయడం సాధ్యం కాకపోవచ్చు.అలాంటి సందర్భాల్లో కుటుంబ సంప్రదాయాలను అనుసరించవచ్చు. అవసరమైతే పండితులు లేదా ఆధ్యాత్మిక నిపుణుల సలహా తీసుకుని పూజకు అనువైన సమయాన్ని నిర్ణయించుకోవచ్చు.హిందూ సంప్రదాయాల్లో ముహూర్తానికి ప్రాధాన్యత ఉన్నప్పటికీ, దీపావళి పండుగ భక్తి, కృతజ్ఞత, కుటుంబ ఐక్యతకు కూడా ప్రతీక. కుటుంబ సభ్యులంతా కలిసి దీపాలు వెలిగించి, లక్ష్మీదేవిని ప్రార్థిస్తూ రాబోయే ఏడాది సుఖశాంతులు, సిరిసంపదలు కలగాలని కోరుకుంటారు.
