పేద విద్యార్థులకు ఆర్థికసాయం అభినందనీయం: మంత్రి వివేక్ వెంకటస్వామి

• అనీవా ఇంజినీరింగ్ సంస్థ చెక్కులు పంపిణీ

కూకట్​పల్లి, వెలుగు: పేద విద్యార్థులకు కార్పొరేట్ సంస్థలు ఆర్థికసాయం చేయడం అభినందనీయమని రాష్ట్ర కార్మిక, గనుల శాఖ మంత్రి డాక్టర్​జి.వివేక్​వెంకటస్వామి అన్నారు. విద్యతోనే యువత, సమాజం అభివృద్ధి చెందుతాయని తెలిపారు. కూకట్​పల్లిలోని అనీవా ఇంజినీరింగ్ ప్రైవేట్​లిమిటెడ్ వారు 100 మంది జేఎన్టీయూ పేద విద్యార్థులను గుర్తించి, కార్పొరేట్ సోషల్​ రెస్పాన్సిబిలిటీలో భాగంగా ఆర్థికసాయం చేసేందుకు ముందుకొచ్చారు. 

ఒక్కొక్కరికి రూ.15 వేల విలువైన చెక్కులను బుధవారం కేపీహెచ్​బీ కాలనీలోని మంజీర ట్రినిటీ మాల్​లో మంత్రి వివేక్ చేతులమీదుగా పంపిణీ చేశారు. ఈ సందర్భంగా ఆయన మాట్లాడుతూ.. కొన్నేండ్లుగా పేద విద్యార్థులకు చేయూతనిస్తున్న అనీవా కంపెనీ యాజమాన్యాన్ని అభినందించారు. దేశ అభివృద్ధిలో ఇంజినీర్ల పాత్ర కీలకమని, విద్యార్థులు ఈ అవకాశాన్ని సద్వినియోగం చేసుకొని, బాగా చదువుకోవాలని సూచించారు. 

పేద విద్యార్థుల చదువులకు ఎలాంటి ఆటంకం కలగకుండా  తమ ప్రభుత్వం చర్యలు తీసుకుంటోందని తెలిపారు. ఏఐతో పోటీ పడగలిగేలా నైపుణ్యాలను సాధించాలని,  లేదంటే భవిష్యత్​లో రాణించడం కష్టమవుతుందని చెప్పారు. ఇంజినీరింగ్​పూర్తి చేసినవారికి టామ్ కామ్​ ద్వారా విదేశాల్లో ఉద్యోగాలు పొందే అవకాశం కల్పిస్తామని హామీ ఇచ్చారు. జేఎన్​టీయూ వీసీ డాక్టర్​కిషన్​కుమార్​రెడ్డి, రిజిస్ట్రార్​డాక్టర్ ఎ.జయలక్ష్మి, ప్రిన్సిపాల్ జి.వి.నరసింహారెడ్డి పాల్గొన్నారు.