మొబైల్ గేమ్ పబ్జీ ఆడుతూ ఆన్ లైన్ లో పరిచయమైన 12 ఏళ్ల బాలికకు మరిన్ని టెక్నిక్స్ నేర్పిస్తామని చెప్పి ఇంటికి పిలిచి ముగ్గురు దుర్మార్గులు రేప్ చేశారు. ఈ ఘోరాన్ని వీడియో తీసి ఎవరికైనా చెబితే సోషల్ మీడియాలో అప్ లోడ్ చేస్తామని బెదిరించి మళ్లీ మళ్లీ అత్యాచారానికి పాల్పడ్డారు. ఈ ఘటన మధ్యప్రదేశ్ లోని భోపాల్ లో జరిగింది. బాధితురాలి కుటుంబసభ్యుల కంప్లైంట్ తో బుధవారం రాత్రి నిందితులు ముగ్గురిని పోలీసులు అరెస్టు చేశారు.
భోపాల్ లోని రాంభా నగర్ కు చెందిన 18-19 ఏళ్ల వయసున్న ముగ్గురు యువకులకు పబ్జీ గేమ్ ఆడుతుండగా చాటింగ్ లో అదే సిటీకి చెందిన 12 ఏళ్ల బాలిక పరిచయమైంది. సెప్టెంబర్ నెలలో కేంద్ర ప్రభుత్వం ఆ యాప్ ను బ్యాన్ చేసే కొద్ది రోజుల ముందు గేమ్ లో మరిన్ని టెక్నిక్స్ నేర్పిస్తామంటూ రాంభా నగర్ లోని తమ ఇంటికి రావాలని పిలిచారు. ఆమె వాళ్ల దగ్గరకు వెళ్లగా.. ఆ ముగ్గురు కలిసి బాలికను రేప్ చేశారు. ఈ మొత్తాన్ని వీడియో తీసి.. ఎవరికైనా చెబితే ఆన్ లైన్ లో పెట్టేస్తామని బెదిరించారు. ఆ వీడియోను అడ్డు పెట్టుకుని బ్లాక్ మెయిల్ చేసి పలుమార్లు ఆమెపై అఘాయిత్యానికి పాల్పడ్డారు. దీంతో రోజుల కొద్దీ తీవ్ర వేదన అనుభవించిన ఆ బాలిక విషయం తల్లిదండ్రులకు చెప్పడంతో వాళ్లు పోలీసులకు ఫిర్యాదు చేశారు. దీనిపై దర్యాప్తు జరిపిన పోలీసులు ముగ్గురు నిందితులను బుధవారం రాత్రి అరెస్టు చేశారు.
