ఖమ్మం, వెలుగు : ఏపీలో ఉన్న బూతుల సంస్కృతిని సీఎం రేవంత్ రెడ్డి తెలంగాణకు తీసుకువచ్చారని ఎమ్మెల్సీ, ఖమ్మం జిల్లా బీఆర్ఎస్ అధ్యక్షుడు తాతా మధు అన్నారు. సోమవారం జిల్లా బీఆర్ఎస్ ఆఫీస్ లో ఆయన మీడియాతో మాట్లాడారు. ఏపీలో లాగానే, తెలంగాణలో కూడా కాంగ్రెస్ నేతలు అరాచక పాలన చేస్తున్నారని విమర్శించారు. బీఆర్ఎస్ కంటే మెరుగ్గా పథకాలను అమలు చేస్తామని అధికారంలోకి వచ్చి 60 రోజులు అయినా కాంగ్రెస్ పథకాలను పూర్తి స్థాయిలో అమలు
చేయలేదన్నారు.
ఎన్ని ఇబ్బందులు ఉన్నా బీఆర్ఎస్ ప్రభుత్వంలో రైతు బంధు సరైన సమయంలో వేశామని గుర్తుచేశారు. జనవరి పెన్షన్లు ఇంతవరకు రాలేదని, రూ.4 వేలు కాదు.. కనీసం ఇంతకు ముందు ఇచ్చిన రూ.2వేలు అయినా ఇవ్వాలని డిమాండ్ చేశారు. కేసీఆర్ గడిలో, కోటల్లో ఉన్నాడని ఎన్నికల ముందు విమర్శించి, ఇప్పుడు డిప్యూటీ సీఎం మల్లు భట్టి విక్రమార్క అదే కోటలో ఉంటున్నారని గుర్తు చేశారు. పార్లమెంట్ ఎన్నికల తరువాత దేశంలో కాంగ్రెస్ కనుమరుగు కావడం ఖాయమన్నారు. సమావేశంలో డీసీసీబీ చైర్మన్ కూరాకుల నాగభూషణం, పలువురు నేతలు పాల్గొన్నారు.
Also Read : కడెం ప్రాజెక్టులో డెడ్బాడీ లభ్యం
