ములుగు, వెలుగు : ప్రతి ఒక్కరూ ఎన్నికల నియమావళిని పక్కాగా పాటించాలని ములుగు కలెక్టర్ ఇలా త్రిపాఠి సూచించారు. రూ.50 వేల కంటే ఎక్కువ నగదును తీసుకెళ్లొద్దని చెప్పారు. శనివారం కలెక్టరేట్ లో ఏర్పాటు చేసిన సమావేశంలో ఆమె అధికారులకు పలు సూచనలు చేశారు. ఓటరు చేతిలో సీ విజిల్ బ్రహ్మాస్త్రం లాంటిదని, ఇప్పటివరకు అందిన ఏడు ఫిర్యాదులను పరిష్కరించామని తెలిపారు. 1950 టోల్ ఫ్రీ నంబర్కు అందిన 68 కాల్స్ తో వచ్చిన ఫిర్యాదులను పరిష్కరించామని చెప్పారు. అక్రమంగా నగదు, మద్యం పంపిణీని అరికట్టేందుకు కట్టుదిట్టమైన చర్యలు తీసుకోవాలన్నారు. జిల్లాలో 9 చెక్ పోస్టులు ఏర్పాటు చేసి 24గంటలపాటు నిఘా ఉంచామన్నారు. ఇప్పటివరకు జిల్లాలో రూ.5.26లక్షలు సీజ్ చేసినట్లు చెప్పారు.
ఏనుమాముల స్ట్రాంగ్ రూమ్ను పరిశీలించిన కలెక్టర్
వరంగల్/ నర్సంపేట, వెలుగు : వరంగల్ ఏనుమాముల మార్కెట్లో ఏర్పాటు చేసిన స్ట్రాంగ్ రూమ్ను రాజకీయ పార్టీల ప్రతినిధులతో కలిసి కలెక్టర్ ప్రావీణ్య శనివారం పరిశీలించారు. గోడౌన్లలో భద్రపర్చిన ఈవీఎంలు, వీవీప్యాట్లను తనిఖీ చేశారు. నర్సంపేట, వర్ధన్నపేట, వరంగల్ ఈస్ట్ నియోజకవర్గాల పోలింగ్ బూత్లను పరిశీలించి సలహాలు, సూచనలు చేశారు. ఈవీఎంలు, వీవీ ప్యాట్లను మూడు నియోజకవర్గాలకు చెందిన రిటర్నింగ్ ఆఫీసర్లకు అప్పగించారు. పోలింగ్ సమయంలో ఈవీఎం, వీవీ ప్యాట్లలో ఎలాంటి సాంకేతిక సమస్యలు రాకుండా ముందస్తు జాగ్రత్తలు తీసుకోవాలని కాంగ్రెస్ పార్టీ ప్రతినిధి తక్కళ్లపల్లి రవీందర్రావు కలెక్టర్ను కోరారు.
