ముంబై: 20 శాతం ఇథనాల్ కలిపిన పెట్రోల్ సేఫ్ కాదంటూ ఇటీవల పెద్దఎత్తున చర్చ జరుగుతోంది. అయితే దీని ద్వారా తాను వ్యక్తిగతంగా లబ్ది పొందానంటూ వస్తోన్న విమర్శలపై కేంద్రమంత్రి నితిన్ గడ్కరీ పరోక్షంగా స్పందించారు. తన బ్రెయిన్ విలువ నెలకు రూ.200 కోట్లని, డబ్బు కోసం తాను దిగజారను అంటూ ఆసక్తికర వ్యాఖ్యలు చేశారు. తన ఆలోచనలు రైతుల మేలు కోసమే తప్ప.. జేబులు నింపుకొనేందుకు కాదని స్పష్టం చేశారు.
నాగ్ పూర్ లో అగ్రికోస్ వెల్ఫేర్ సొసైటీ నిర్వహించిన ఓ కార్య క్రమంలో ఆయన మాట్లాడుతూ 'నేను డబ్బు కోసం ఇలా చేస్తున్నానని మీరు అనుకుంటున్నారా? నిజాయితీతో ఎలా సంపాదించాలో నాకు తెలుసు. నాకూ ఓ ఫ్యామిలీ, ఇల్లు ఉంది. నేను సాధువును కాదు.. రాజకీయ నాయకుడిని. కానీ విదర్భలో దాదాపు 10 వేల మంది రైతుల ఆత్మహత్యలు తీవ్ర అవమానకరమైన విషయం అని నేను ఎప్పుడూ నమ్ముతాను. రైతుల శ్రేయస్సు కోసం మా ప్రయత్నాలు కొనసాగుతాయి' అని అన్నారు.
