‘అఖండ’ విజయం తర్వాత బాలకృష్ణ కెరీర్ మరింత స్పీడందుకుంది. గోపీచంద్ మలినేని డైరెక్షన్‌లో మూవీని శరవేగంగా పూర్తి చేస్తున్నారు. త్వరలోనే అనిల్ రావిపూడితో తన నూట ఎనిమిదో సినిమాని స్టార్ట్ చేయడానికి కూడా రెడీ అవుతున్నారు. ఈ విషయాన్ని నిన్న అఫీషియల్‌గా అనౌన్స్ చేశారు. సాహు గారపాటి, హరీష్ పెద్ది నిర్మించనున్న ఈ మూవీకి తమన్ సంగీతం అందించనున్నాడు. త్వరలోనే షూటింగ్ మొదలు కాబోతోందని చెబుతూ ఓ స్పెషల్ వీడియోని వదిలారు. దీనికి తమన్ ఇచ్చిన బీజీఎం ఓ రేంజ్‌లో ఉండటం చూస్తే.. ‘అఖండ’ని మించి మ్యూజిక్ ఇవ్వడానికి రెడీ అయ్యాడనిపిస్తోంది.
మాస్‌ పల్స్ తెలిసిన దర్శకుడు అనిల్ రావిపూడి.. బాలయ్య కోసం ఓ అదిరిపోయే స్క్రిప్ట్ రెడీ చేశారని టీమ్ చెబుతోంది. ఇంతవరకు ఎప్పుడూ చూడని విధంగా బాలకృష్ణ క్యారెక్టర్‌‌ని డిజైన్ చేశారంటూ ఊరిస్తోంది. ‘పెళ్లిసందడి’ ఫేమ్ శ్రీలీల బాలయ్యకి కూతురిగా కనిపించబోతోంది. ఓ హత్య కేసులో బాలయ్య జైలుకు వెళ్తారని, పద్నాలుగేళ్ల తర్వాత విడుదలైన ఆయనకి, కూతురికి మధ్య నడిచే కథ అని చెప్పుకుంటున్నారు. ‘ఐ డోన్ట్ కేర్’ అనే టైటిల్‌ని ఫిక్స్ చేసినట్టు ప్రచారం జరుగుతోంది. త్వరలోనే వీటిపై క్లారిటీ వచ్చే అవకాశం ఉంది.
