మెహిదీపట్నం, వెలుగు: అధికారుల సమన్వయ లోపంతో కొత్త రోడ్డు ధ్వంసం అవుతోంది. లీకేజీ కారణంగా ఆ రోడ్డును తవ్వాల్సి రావడంతో ప్రజలు అసహనం వ్యక్తం చేస్తున్నారు. గోల్కొండ బోనాల జాతరను పురస్కరించుకుని జూన్ 25న రూ.9 లక్షలతో లంగర్ హౌజ్ వద్ద సీసీ రోడ్డు వేశారు.
దీనికి ఒక రోజు ముందే జల మండలి అధికారులు పైప్ లైన్ మరమ్మత్తులు పనులు చేశారు. ఈ రెండు పనులను హడావిడిగా నిర్వహించారు. ప్రస్తుతం పైప్లైన్ లీకేజీ కావడంతో బుధవారం జీహెచ్ఎంసీ అధికారులు కొత్త రోడ్డును తవ్వి మరమ్మతు పనులు చేశారు. పైపులైన్, సీసీ రోడ్డు వేసిన కొన్ని రోజులకే పైపులైన్ లీకేజీ రావడానికి కారణం అధికారుల సమన్వయ లోపమేనని ప్రజలు ఆరోపిస్తున్నారు.
