రెండు మీటింగ్లతోనే సరి
కరోనా సాకుతో నెట్టుకొస్తున్న కౌన్సిల్
ప్రభుత్వ ఆదేశాలకు అధికారుల వెయిటింగ్
హైదరాబాద్, వెలుగు: బల్దియా కౌన్సిల్ ఏర్పడి ఏడాది పూర్తవగా, ఇప్పటివరకు రెండే మీటింగ్లు జరిగాయి. గతేడాది ఫిబ్రవరి11న కొత్త కౌన్సిల్ ఏర్పడగా మేయర్ గా గద్వాల్ విజయలక్ష్మి , డిప్యూటీ మేయర్ గా మోతె శ్రీలత రెడ్డి ఎన్నికయ్యారు. రెండు జనరల్బాడీ మీటింగ్ల్లో ఒకటి గతేడాది జూన్ 29న వర్చువల్ గా, మరొకటి డిసెంబర్ 4న జరిగాయి. ఇందులో సభ్యులు అడిగిన ఏ ఒక్క ప్రశ్నకు సరైన సమాధానం ఇవ్వపోవడంతో ప్రతిపక్ష సభ్యులు తీవ్ర అసంతృప్తి వ్యక్తం చేశారు. ప్రతి3 నెలలకోసారి నిర్వహించాల్సిన జనరల్బాడీ మీటింగ్ను కూడా కరోనా సాకుతో పెట్టడడంలేదు. దీనిపైన ప్రతిపక్ష సభ్యులు ప్రతిసారి ఆందోళన చేస్తున్నా మేయర్ పట్టించుకోకపోగా కమిషనర్ ను కలిసి కౌన్సిల్పెట్టాలని కూడా డిమాండ్ చేశారు. ప్రజా సమస్యలపై చర్చించేందుకు జనరల్ బాడీ మీటింగ్ఏర్పాటు చేయకపోతుండగా పలుమార్లు ఆందోళనలు నిర్వహించారు. ప్రస్తుతం గ్రేటర్ సమస్యలపై చర్చలే లేవు.
కో ఆప్షన్ సభ్యులెక్కడ..
కౌన్సిల్ఏర్పడిన రెండు నెలల్లోపు కో ఆప్షన్ సభ్యుల ఎన్నిక కంప్లీట్ కావాల్సి ఉండగా, ఇప్పటివరకు నియామకమే లేదు. గతేడాది మార్చిలో నోటిఫికేషన్ఇచ్చి, ఆ తర్వాత వెంటనే రద్దు చేశారు. ఐదుగురు కో ఆప్షన్ సభ్యులను ఎన్నుకోవాల్సి ఉండగా, ప్రభుత్వం నుంచి ఎలాంటి ఆదేశాలు రాకపోగా నిలిపేసినట్లు తెలిసింది. స్టాండింగ్ కమిటీ సభ్యులను కూడా కౌన్సిల్ఏర్పడిన 9 నెలలకు గతేడాది నవంబర్16 న ఎన్నుకున్నారు.
వార్డు సభ్యుల ఎన్నిక అంతే..
గ్రేటర్లో 150 డివిజన్లులుండగా, బల్దియా యాక్ట్‌ మేరకు కౌన్సిల్ఏర్పడిన తర్వాత వెంటనే పాలనలో పౌరుల భాగస్వామ్యం మరింత పెంచేందుకు వార్డు కమిటీలను నియమించాలి. కౌన్సిల్ ఏర్పడినా ఇప్పటివరకు ఎంపిక చేయలేదు. ప్రభుత్వం నుంచి ఆదేశాలు లేకనే కమిటీలను నియమించడం లేదు. ఒక్కో వార్డు కమిటీలో100 మంది సభ్యులను ఎన్నుకోవాలి. గ్రేటర్లో మొత్తం15వేల సభ్యులకు అవకాశం ఉంది. ప్రతిసారి నామమాత్రంగా 10 నుంచి 15 మందిని ఎన్నుకొని పక్కన పెట్టేస్తుండగా కమిటీ లక్ష్యం నెర వేరడంలేదు.
