పాలిటెక్నిక్ విద్యపై అపోహలొద్దు.. విద్యార్థుల భవిష్యత్తుకు భరోసా

విద్యార్థుల భవిష్యత్తుకు భరోసాతో సాంకేతిక విద్యలో సంస్కరణలు అవసరం. పాలిటెక్నిక్ విద్యార్థులు తమ చదువు, డిప్లొమా విలువ, భవిష్యత్తు అవకాశాలపై సందేహాలు వ్యక్తం చేస్తూ ఆందోళనకు దిగడం సహజం. వారి ప్రశ్నలకు ప్రభుత్వం స్పష్టమైన సమాధానం ఇస్తుంది.

అందువల్ల ప్రస్తుత చర్చను ‘సంస్కరణలకు వ్యతిరేకమా, అనుకూలమా?’ అనే రాజకీయ కోణంలో కాకుండా, ‘విద్యార్థుల హక్కులను కాపాడుతూ సాంకేతిక విద్యను భవిష్యత్తు అవసరాలకు ఎలా సిద్ధం చేయాలి?’ అనే విధానపరమైన ప్రశ్నగా చూడాలి. ఈ చర్చకు వాస్తవ పరిస్థితులే పునాది కావాలి.

తెలంగాణలో పాలిటెక్నిక్ ప్రవేశ ప్రక్రియలో సుమారు 33,140 సీట్లు, పారిశ్రామిక శిక్షణ సంస్థల్లో 98,312 మంజూరైన సీట్లు ఉన్నాయి. రాష్ట్రంలో 63 ప్రభుత్వ, 230 ప్రైవేటు పారిశ్రామిక శిక్షణ సంస్థలతోపాటు 65 అధునాతన సాంకేతిక కేంద్రాలు అభివృద్ధి చెందుతున్నాయి.

లక్షలాది కుటుంబాల ఆశలు, ఆర్థిక భవిష్యత్తు దీనితో ముడిపడి ఉన్నాయి. కాబట్టి ఈ మార్పులను రాజకీయ మద్దతు, వ్యతిరేకతలతో కాకుండా, విద్యార్థులకు కలిగే ప్రయోజనం ఆధారంగా చూడాలి. డిప్లొమా ధ్రువపత్రం పొందడం మాత్రమే విద్య లక్ష్యం కాదు. ఆ విద్యను ఉపయోగించి విద్యార్థి ఉద్యోగాన్ని సంపాదించుకోగలగాలి. అవసరమైతే స్వయం ఉపాధిని ప్రారంభించగలగాలి.

సాంకేతిక విద్య ఆధునికీకరణ
రాబోయే సంవత్సరాల్లో అవసరమయ్యే నైపుణ్యాలను ముందుగానే అంచనా వేసి వ్యవస్థను మార్చడం ప్రభుత్వ బాధ్యత. అందుకే ప్రస్తుత ప్రభుత్వం చేపడుతున్న సాంకేతిక విద్య ఆధునికీకరణను ఈ నిరంతర మార్పు ప్రక్రియలో భాగంగా చూడాలి. పారిశ్రామిక శిక్షణా సంస్థలను అధునాతన సాంకేతిక కేంద్రాలుగా అభివృద్ధి చేయడం అందులో ఒక ముఖ్యమైన చర్య. మల్లేపల్లి పారిశ్రామిక శిక్షణా సంస్థను ఆధునిక సాంకేతిక శిక్షణా కేంద్రంగా తీర్చిదిద్దే ప్రయత్నం ఈ దిశలో ప్రాధాన్యం కలిగినది. విద్యార్థికి ప్రాయోగిక సామర్థ్యం ఎంత పెరిగింది, పరిశ్రమతో అనుసంధానం ఎంత బలపడింది, శిక్షణ అనంతరం ఉపాధి అవకాశాలు ఎంత విస్తరించాయి అనేవే అసలు ప్రశ్నలు.

నైపుణ్య విశ్వవిద్యాలయం ఏర్పాటును కూడా ఇదే దృష్టితో చూడాలి. పారిశ్రామిక శిక్షణా సంస్థలు, పాలిటెక్నిక్ కళాశాలలు, నైపుణ్య విశ్వవిద్యాలయం ఒకదానికొకటి సంబంధం లేని సంస్థలుగా ఉండకూడదు. విద్యార్థి తన సామర్థ్యాన్ని బట్టి ఒక స్థాయి నుంచి మరొక స్థాయికి ఎదగడానికి స్పష్టమైన మార్గం ఉండాలి. ప్రాథమిక పారిశ్రామిక శిక్షణ, పాలిటెక్నిక్ సాంకేతిక విద్య, అధునాతన నైపుణ్య శిక్షణ పరస్పరం అనుసంధానమైతే విద్యార్థికి ఒక నిరంతర విద్యా మార్గం ఏర్పడుతుంది. అదే సమయంలో పాలిటెక్నిక్ విద్యార్థుల ప్రస్తుత అవకాశాలను తగ్గించకుండా ఈ అనుసంధానం జరగాలి.

టాటా టెక్నాలజీస్ రూ.2,100 కోట్ల పెట్టుబడి
పరిశ్రమల భాగస్వామ్యం విషయంలో కూడా ఇదే సమతుల్యత అవసరం. ప్రభుత్వం రూ.300 కోట్లు పెట్టుబడి పెట్టగా, టాటా టెక్నాలజీస్ రూ.2,100 కోట్లకు పైగా పెట్టుబడి పెట్టేవిధంగా ఏర్పడిన భాగ స్వామ్యం ఆధునిక పరికరాలు, సాంకేతిక పరిజ్ఞానం, శిక్షణా వనరులను తీసుకురావడానికి ఉపయోగపడుతుంది.

అయితే పరిశ్రమ భాగస్వామ్యం పెరిగినంత మాత్రాన ప్రభుత్వ బాధ్యత తగ్గదు. ప్రజా ప్రయోజనమే కేంద్రంగా ఉండాలి అనేది ఈ భాగస్వామ్యానికి కీలకమైన సూత్రం. పరిశ్రమల వనరులను విద్యార్థులకు అందుబాటులోకి తీసుకురావడం, విద్యార్థుల హక్కులను రక్షించడం వంటి అంశాల్లో ప్రభుత్వ బాధ్యత మరింత పెరుగుతుంది.

పరిశ్రమ తన సాంకేతిక అనుభవాన్ని అందిస్తుంది. విద్యార్థుల భవిష్యత్తుకు భరోసా కల్పించాల్సిన బాధ్యత ప్రభుత్వానిదే. యువతకు నాణ్యమైన విద్య, మెరుగైన సామర్థ్యం, ఉద్యోగ, స్వయం ఉపాధి అవకాశాలు లభించి, కుటుంబాల ఆర్థిక స్థితి మెరుగుపడినప్పుడే ప్రభుత్వం తన విధానం విజయవంతమైనట్లు భావిస్తుంది. 65 అధునాతన సాంకేతిక కేంద్రాల ఏర్పాటు సాంకేతిక విద్యలో ప్రభుత్వం తీసుకుంటున్న ముఖ్యమైన ముందడుగు. వీటి ద్వారా విద్యార్థులకు ఆధునిక శిక్షణ, పరిశ్రమలతో అనుసంధానం, మెరుగైన ఉపాధి అవకాశాలు మరింత విస్తరిస్తాయి.

సమగ్ర అభివృద్ధి కోసం నైపుణ్య శిక్షణ
ఈ నేపథ్యంలో ప్రపంచంలోని వివిధ ప్రాంతాల్లో సాంకేతిక విద్య, నైపుణ్య శిక్షణ, పరిశ్రమల అనుసంధాన విధానాలను సీఎం రేవంత్ రెడ్డి పరిశీలించడం ప్రాధాన్యమైన విషయం. విద్యాశాఖను ముఖ్యమంత్రి స్వయంగా నిర్వహిస్తున్న నేపథ్యంలో, పాఠశాల విద్య నుంచి ఉన్నత విద్య వరకు, సాంకేతిక విద్య నుంచి నైపుణ్య శిక్షణ వరకు సమగ్రంగా అభివృద్ధి చేయాలన్నది ఆయన అభిలాష. ఈ దిశలోనే మల్లేపల్లి వంటి పారిశ్రామిక శిక్షణా సంస్థలను ఆధునిక సాంకేతిక కేంద్రాలుగా తీర్చిదిద్దే చర్యలు కొనసాగుతున్నాయి.

తెలంగాణ యువతకు నాణ్యమైన సాంకేతిక శిక్షణ అందించాలన్నదే ప్రభుత్వ లక్ష్యం. అయితే సంస్కరణలపై విద్యార్థులు లేవనెత్తే ప్రశ్నలను, సందేహాలను ప్రభుత్వం వింటుంది, ప్రస్తుత విద్యార్థుల చదువుకు ఎలాంటి అంతరాయం ఉండదనే భరోసాను ప్రభుత్వం ఇస్తుంది. ఈ పారదర్శక విధానం అపోహలను తగ్గించి, విద్యార్థుల్లో విశ్వాసాన్ని పెంచుతుంది. ప్రతిపక్షాలు కూడా ఈ అంశాన్ని రాజకీయ ప్రచారానికి మాత్రమే పరిమితం చేయకుండా నిర్మాణాత్మక చర్చకు తీసుకురావాలి.

విద్యార్థుల భవిష్యత్తుకు భరోసా
పాలిటెక్నిక్ విద్య, పారిశ్రామిక శిక్షణా సంస్థలు, అధునాతన సాంకేతిక కేంద్రాలు, నైపుణ్య విశ్వవిద్యాలయం పరస్పరం అనుసంధానమైతే యువతకు కొత్త అవకాశాలు ఏర్పడతాయి. అయితే ఈ మార్పుకు తుది ప్రమాణం భవనాలు, కేంద్రాలు, ప్రకటనలతోపాటు వాటి ద్వారా విద్యార్థి జీవితంలో ఏర్పడే మార్పు కూడా కావాలి. విద్యార్థి ఏం నేర్చుకున్నాడు, ఎలాంటి నైపుణ్యం సంపాదించాడు, ఉద్యోగం పొందాడా, స్వయం ఉపాధి చేయగలిగాడా, అతని కుటుంబ ఆర్థిక పరిస్థితి మెరుగుపడి అభివృద్ధి చెందే అవకాశం ఏర్పడిందా అన్నదే అసలు ప్రమాణం. పాలిటెక్నిక్ విద్యను కాపాడటం అంటే మార్పును ఆపడం కాదు.

విద్యార్థుల భవిష్యత్తుకు భరోసా కల్పిస్తూ, వారిని మారుతున్న సాంకేతిక ప్రపంచానికి సిద్ధం చేయడమే లక్ష్యంగా ప్రభుత్వం ముందుకు సాగుతోంది. ఒకవైపు ప్రస్తుత విద్యార్థుల హక్కులకు భరోసా ఇస్తూనే, మరోవైపు సాంకేతిక విద్యను భవిష్యత్తు అవసరాలకు అనుగుణంగా తీర్చిదిద్దుతోంది. తెలంగాణ యువత భవిష్యత్తును కాపాడాలంటే విద్యను కాలంతో పాటు మార్చాలి. ఆ మార్పును ప్రజా ప్రయోజనంతో నడపాలి. ప్రతి సంస్కరణకు అంతిమ ప్రమాణం ఒక్కటే - ఈ రాష్ట్ర ప్రజల శ్రేయస్సు. జై హింద్! జై తెలంగాణ!