హైదరాబాద్, వెలుగు: ఊహించినట్టుగానే 317 జీవో బాధిత టీచర్లకు రాష్ట్ర సర్కార్ షాక్ ఇచ్చింది. జీరో సర్వీస్తో బదిలీలకు అవకాశం ఇవ్వబోమని స్పష్టం చేసింది. రెండేండ్ల స్టేషన్ సీనియార్టీ ఉంటేనే ట్రాన్స్ఫర్లకు అవకాశం ఇస్తామని ప్రకటించింది. గురువారం టీచర్ల బదిలీలు, ప్రమోషన్లకు సంబంధించిన షెడ్యూల్, గైడ్లైన్స్ను సర్కారు రిలీజ్ చేసింది. ఈ మేరకు విద్యాశాఖ కార్యదర్శి వాకాటి కరుణ జీవో నంబర్5 విడుదల చేశారు. మూడు రోజుల కింద బయటకొచ్చిన గైడ్లైన్స్, షెడ్యూల్లోని అంశాలే దాదాపు వాటిలో ఉన్నాయి. రెండేండ్ల సర్వీస్తోనే బదిలీలు ఉంటాయని డ్రాఫ్ట్ లో ఉండగానే టీచర్స్ యూనియన్లు దీనిపై ఆందోళనలు చేపట్టాయి. జీరో సర్వీస్తోనే ట్రాన్స్ఫర్లు చేపట్టాలని డిమాండ్ చేశాయి.
9,700 మందికి ప్రమోషన్లు, 40 వేల మంది ట్రాన్స్ఫర్
టీచర్ల ట్రాన్స్ఫర్లు, ప్రమోషన్ల ప్రక్రియ శుక్రవారం నుంచి స్టార్ట్ కానున్నది. మార్చి 3 వరకు కొనసాగుతుంది. 37 రోజుల పాటు జరిగే ఈ ప్రాసెస్లో సుమారు 9,700 మందికి ప్రమోషన్లు పొందనుండగా, సుమారు 30 వేల నుంచి 40 వేల మంది ట్రాన్స్ఫర్కానున్నారు. 27న హెడ్మాస్టర్ల ప్రమోషన్లకు అర్హులైన సీనియార్టీ లిస్టులతో పాటు ఖాళీల వివరాలను అధికారులు ప్రకటిస్తారు. 28 నుంచి 30 వరకు కేవలం మూడు రోజుల్లో టీచర్లంతా ఆన్ లైన్లో దరఖాస్తు చేసుకోవాలి. అప్లికేషన్ హార్డ్ కాపీలను ఈ నెల 31 నుంచి ఫిబ్రవరి 2 వరకు సంబంధిత అధికారులకు అందించాలి. ఫిబ్రవరి 7న డీఈవో, ఆర్జేడీ వెబ్ సైట్లలో సీనియార్టీ లిస్టులు పెడతారు. ఫిబ్రవరి 14న హెడ్మాస్టర్ల బదిలీ ఉత్తర్వులు ఇవ్వనున్నారు. గతంలో ప్రకటించిన షెడ్యూల్ యథాతథంగా కొనసాగనున్నది. హెడ్మాస్టర్లకు మల్టీజోన్ స్థాయిలో, టీచర్లకు జిల్లా స్థాయిలో బదిలీలు, ప్రమోషన్లు ఉండనున్నాయి.
జీరో సర్వీస్తోనే బదిలీలు చేయాలె: సంఘాలు
సాధారణ బదిలీల్లో జీరో సర్వీసుతో టీచర్లకు దరఖాస్తు చేసుకొనే అవకాశం ఇవ్వాలని టీచర్ల సంఘాలు డిమాండ్ చేస్తున్నాయి.
లాస్ట్ వర్కింగ్ డే వరకు పాత స్కూల్లోనే
ప్రస్తుతం పనిచేస్తున్న స్కూల్ నుంచి వేరే స్కూల్కు బదిలీ అయినా.. ప్రమోషన్ పొందినా స్కూల్ లాస్ట్ వర్కింగ్ డే వరకు పాత స్కూల్లోనే కొనసాగాలని విద్యాశాఖ ఉత్తర్వుల్లో పేర్కొన్నారు. ఏప్రిల్ 23న రిలీవ్అయి, బదిలీ/ప్రమోషన్ పొందిన స్కూల్లో 24న జాయిన్ కావాలని వెల్లడించారు. ఈ సందర్భంగా ఐదేండ్ల స్టేషన్ సీనియారిటీ ఉన్న హెడ్మాస్టర్లు, 8 ఏండ్ల సీనియార్టీ ఉన్న టీచర్లు తప్పనిసరిగా బదిలీ కావాల్సి ఉంది. వాళ్లు ప్రస్తుతం పనిచేస్తున్న స్కూళ్ల వివరాలను ఖాళీల జాబితాలో చూపించనున్నారు. సీనియారిటీ సర్వీస్ పాయింట్లను 0.041 ప్రతి నెలా యాడ్ కానున్నాయి. గతంలో స్కూళ్లను నాలుగు కేటగిరీలుగా చూపించగా, ఈ ఏడాది హెచ్ఆర్ఏకు అనుగుణంగా మూడు కేటగిరీలుగా మార్చారు.