భువనేశ్వర్: విద్యార్థుల జీవితంలో పుస్తకాల పాత్ర అత్యంత కీలకం. పుస్తకాలను జ్ఞాన గనులు అంటుంటారు. బుక్స్ చదవడం ద్వారా విద్యార్థులు జ్ఞానాన్ని సంపాదిస్తారు. ఎన్నో కొత్త కొత్త విషయాలను తెలుసుకుంటారు. విద్యార్థుల కెరీర్లో ఇంతటి కీలక పాత్ర పోషించే పుస్తకాల్లో తప్పులు దొర్లితే అది విద్యార్థుల భవిష్యత్కే ప్రమాదకరం. తాజాగా ఒడిషాలో ఇదే జరిగింది. 1 నుంచి 8వ తరగతి వరకు పాఠ్య పుస్తకాలు తప్పుల తడకగా ఉన్నాయి.
పుస్తకాల్లో ఏకంగా 1,678 తప్పులు దొర్లాయి. పిల్లలు చదువుకునే పుస్తకాల్లో భారీగా తప్పులు ఉండటంపై ఒడిషా ప్రభుత్వం తీవ్ర ఆగ్రహం వ్యక్తం చేసింది. ఈ ఘటనపై గుర్రుగా ఉన్న సీఎం మోహన్ చరణ్ మాఝీ పాఠ్య పుస్తకాల్లో తప్పుల ఘటనపై క్రిమినల్ దర్యాప్తునకు ఆదేశించారు. ఈ మొత్తం ప్రక్రియపై సమగ్ర విచారణ జరిపేందుకు ఎఫ్ఐఆర్ నమోదు చేయాలని క్రైమ్ బ్రాంచ్కు ఆదేశాలు జారీ చేశారు. పాఠ్యపుస్తకాల తయారీలో జరిగిన లోపాలు నేరపూరిత బాధ్యతను మోపాల్సినంత తీవ్రమైనవని ఆయన పేర్కొన్నారు.
విద్యా వ్యవస్థపై విశ్వాసాన్ని పునరుద్ధరించడానికి ప్రభుత్వం కట్టుబడి ఉందని స్పష్టం చేశారు. బాధ్యులను గుర్తించి, దిద్దుబాటు చర్యలను త్వరితగతిన అమలు జరిగేలా చూడటమే ఈ దర్యాప్తు లక్ష్యమని తెలిపారు. ఈ ఘటనలో మాజీ ఎస్సీఈఆర్టీ డైరెక్టర్, ముగ్గురు అసిస్టెంట్ డైరెక్టర్లను సస్పెండ్ చేయగా.. మరో ఆరుగురిపై క్రమశిక్షణా చర్యలకు ఇప్పటికే ప్రభుత్వం ఆదేశించింది. తప్పులున్న పాఠ్యపుస్తకాలను పాఠశాలల నుంచి వెంటనే ఉపసంహరించుకోవాలని ప్రభుత్వం నిర్ణయించింది.
