కొచ్చి: కాంగ్రెస్ ప్రెసిడెంట్ ఎన్నికల వేళ రాహుల్ గాంధీ కీలక కామెంట్లు చేశారు. ‘పార్టీలో ఒక్క వ్యక్తికి ఒక్క పదవి’ అనే నియమం కొనసాగుతుందని స్పష్టంచేశారు. భారత్ జోడో యాత్రలో భాగంగా గురువారం కొచ్చిలో రాహుల్ మీడియాతో మాట్లాడారు. ఈ సందర్భంగా ఉదయ్ పూర్ చింతన్ శిబిర్ లో తీసుకున్న నిర్ణయంమేరకు ‘‘వన్ మ్యాన్ - వన్ పోస్టు’’ రూల్ అమలవుతుందా? అని మీడియా ప్రశ్నించింది. ‘‘ఉదయ్ పూర్లో మేం తీసుకున్న నిర్ణయాన్ని అమలుచేయాలని ఆశిస్తున్నాం” అని రాహుల్ చెప్పారు. కాంగ్రెస్ ప్రెసిడెంట్ పదవి కేవలం పోస్టు మాత్రమే కాదన్నారు.
ప్రెసిడెంట్ అయ్యే వ్యక్తి కొన్ని విషయాలను గుర్తించుకోవాలన్నారు. ‘‘అది చరిత్రాత్మక స్థానం. ఆ పోస్టు కొన్ని ఐడియాలు, నమ్మకమైన వ్యవస్థ, దేశ విజన్కు నిదర్శనం” అని చెప్పారు.
గెహ్లాట్ కామెంట్ల నేపథ్యంలో... రాజస్థాన్ సీఎం అశోక్ గెహ్లాట్ పార్టీ ప్రెసిడెంట్ పదవికి పోటీ చేసేందుకు సిద్ధమయ్యారు. సీఎంగా ఉంటూనే ప్రెసిడెంట్గా పనిచేసేందుకు సిద్ధమని చెప్పారు. ఈ నేపథ్యంలో ఒక్కరికి ఒక్క పదవేనన్న రాహుల్ కామెంట్ చర్చనీయాంశమైంది.
