న్యూఢిల్లీ: గ్లోబల్ టెక్నాలజీ కంపెనీ ఒరాకిల్ కార్పొరేషన్ గత 12 నెలల్లో ఏకంగా 21వేల మంది ఉద్యోగులను తొలగించింది. కంపెనీ వార్షిక ఆర్థిక నియంత్రణ ఫైలింగ్లో ఈ విషయాన్ని వెల్లడించింది.
తమ వ్యాపార కార్యకలాపాలలో ఏఐ టెక్నాలజీలను పెద్ద ఎత్తున అమలు చేయడం, విస్తరించడం వల్లే ఈ స్థాయిలో ఉద్యోగాల కోత విధించాల్సి వచ్చిందని కంపెనీ స్పష్టం చేసింది. భవిష్యత్తులో కూడా ఏఐ విస్తరణ కారణంగా ఉద్యోగాల తగ్గింపు కొనసాగే అవకాశం ఉందని పేర్కొంది.
తాజా లేఆఫ్స్ తర్వాత మే 31 నాటికి ముగిసిన ఆర్థిక సంవత్సరం చివరికి కంపెనీ ఉద్యోగుల సంఖ్య 1.41 లక్షలకు తగ్గింది. అంతకు ముందు సంవత్సరంలో ఈ సంఖ్య 1.62 లక్షలు ఉండేది.
ఏఐ డేటా సెంటర్లను నిర్మించడానికి ఒరాకిల్ భారీగా నిధులను ఖర్చు చేస్తోంది. ఈ ఖర్చుల వల్ల కంపెనీపై తీవ్ర ఆర్థిక ఒత్తిడి పెరుగుతోంది. నగదును ఆదా చేసే వ్యూహంలో భాగంగానే ఈ ఉద్యోగాల కోత విధించింది.
