కేంద్రప్రభుత్వం ప్రవేశపెట్టిన వన్ స్టేషన్ వన్ ప్రొడక్ట్ (OSOP) కాన్సెప్ట్ ను అమలు చేయడంలో రైల్వే అధికారులు స్పీడ్ పెంచారు. గంటలు గంటలుగా ప్రయాణించి అలసిపోయిన ప్రయాణికులకు ఎనర్జీని ఇవ్వడానికి రైల్వేస్టేషన్లో మిల్లెట్స్ ను అందుబాటులోకి తీసుకొచ్చారు. ఈ క్రమంలోనే సికింద్రాబాద్, హైదరాబాద్, బేగంపేట, ఈ మూడు రైల్వేస్టేషన్లలో మిల్లెట్ ప్రొడక్ట్స్ స్టాల్స్ ను ప్రారంభించారు అధికారులు.
సికింద్రాబాద్ స్టేషన్ లోని ప్లాట్ పారమ్ -10లో ఓఎస్ఓపీ కాన్సెప్ట్(ఒకే స్టేషన్ ఒకే ఉత్పత్తి) పథకం కింద ఒక స్టాల్ ప్రారంభించారు. ఈ స్టాల్ లో మిల్లెట్ తో తయారయ్యే స్వీట్లు, స్నాక్స్ అమ్మనున్నారు. బేగంపేట ప్లాట్ ఫారమ్- 2లో మిల్లెట్ చిక్కీలను అమ్ముతున్నారు.
హైదరాబాద్ స్టేషన్ లో ఏర్పాటు చేసిన స్టాల్ లో ఏన్షియంట్ ఫుడ్స్, మిల్లెట్ బ్రేక్ ఫాస్ట్ ఫుడ్స్, స్నాక్స్ లు అమ్ముతున్నారు . మిల్లెట్స్ ఆహారంలో అంతర్భాగం అయినప్పటికీ వీటి వల్ల అనేక ప్రయోజనాలు ఉన్నాయి.
అంతర్జాతీయ మిల్లెట్స్ సంవత్సరంగా 2023
మినుములపై అవగాహన కల్పించడం, ఉత్పత్తి , వినియోగాన్ని పెంచే లక్ష్యంతో, ఐక్యరాజ్యసమితి 2023ని అంతర్జాతీయ మిల్లెట్స్ సంవత్సరంగా ప్రకటించింది. ఈ క్రమంలోనే మిల్లెట్ తో తయారయ్యే ప్రొడక్ట్స్ ను అమ్మకాలను రైల్వే శాఖ ప్రోత్సహిస్తోంది.
2022-23 కేంద్ర బడ్జెట్లో 'ఒక స్టేషన్ ఒక ఉత్పత్తి' అనే పథకాన్ని ప్రభుత్వం ప్రకటించింది. దేశవ్యాప్తంగా 535 రైల్వే స్టేషన్లను ఎంపిక చేసింది కేంద్రం. ప్రతి రైల్వే స్టేషన్ను ప్రమోషనల్ హబ్గా నిర్మించడం, స్థానిక , స్వదేశీ తయారీ ప్రొడక్ట్స్ ను ప్రదర్శించడం ఈ స్కీమ్ ముఖ్య ఉద్దేశం.
ఈ పథకం పైలట్ ప్రాజెక్టు కింద 2022 మార్చి 25 న ప్రారంభించబడింది. వోకల్ ఫర్ లోకల్ను ప్రోత్సహించే లక్ష్యంతో OSOP పథకం ప్రారంభించబడింది. ఇది స్థానిక తయారీదారులు తమ ప్రొడక్ట్స్ ను అమ్ముకోవడానికి ఉపయోగపడుతుంది. అలాగే సమాజంలోని అట్టడుగు వర్గాలకు అదనపు ఆదాయం సంపాదించుకోవడానికి ఇదొక అవకాశం. ఈ స్కీం కింద అర్హులైన దరఖాస్తుదారులందరికీ రొటేషన్ ప్రకారం స్టాల్ కేటాయిస్తారు. స్టాల్ కావాలనుకునే వాళ్లు ఎంపిక చేసిన రైల్వేస్టేషన్లో రూ.1000 డిపాజిట్ చేయాలి. తర్వాత 15 రోజుల పాటు తాత్కాలిక స్టాల్ కేటాయిస్తారు.
OSOP స్కీం కింద ఏ ఏ ప్రొడక్ట్స్ అమ్ముకోవచ్చంటే?
- ఆహార పదార్థాలు (సీజనల్ లేదా ప్రాసెస్డ్ లేదా సెమీ ప్రాసెస్డ్ ఫుడ్స్)
- హస్తకళలు
- కళాఖండాలు
- వస్త్రాలు
- చేనేత వస్త్రాలు
- సాంప్రదాయ వస్త్రాలు
- స్థానిక వ్యవసాయ ఉత్పత్తులు
- స్థానిక బొమ్మలు
- తోలు ఉత్పత్తులు
- స్థానిక రత్నాలు, ఆభరణాలు