గ్రామ పంచాయతీ కార్మికులకు ప్రభుత్వం పెంచిన రూ.8500 జీతాలు ఇవ్వాలని గ్రామ పంచాయతీ ఎంప్లాయీస్ అండ్ వర్కర్స్ యూనియన్ గౌరవ అధ్యక్షుడు పాలడుగు భాస్కర్ డిమాండ్ చేశారు. శుక్రవారం హిమాయత్నగర్ లోని పంచాయతీ రాజ్ కమిషనర్ ఆఫీసు ముందు సుమారు వెయ్యి మంది కార్మికులు ఆందోళన చేశారు. ఈ సందర్భంగా భాస్కర్ మాట్లాడుతూ ఐదేండ్లుగా జీతాలు పెంచాలని ధర్నాలు, సమ్మెలు చేస్తుంటే జీవో విడుదల చేసి ప్రభుత్వం చేతులు దులుపుకుందన్నారు. కాని ఏ ఫండ్స్ నుంచి ఇవ్వాలో స్పష్టత ఇవ్వలేదన్నారు. గతంలో మాదిరిగా కేటగిరి విధానాన్ని కొనసాగించటంతో పాటు మల్టీపర్పస్ విధానాన్ని రద్దు చేయాలని డిమాండ్ చేశారు. కార్మికులను సర్పంచ్ లు అక్రమంగా తొలగిస్తున్నారని, వారిపై చర్యలు తీసుకోవాలన్నారు. ఎస్కే డే పేరిట ప్రవేశపెట్టిన ఇన్సూరెన్స్ను ప్రభుత్వమే చెల్లించాలని కోరారు. కార్మికులతోని బాండ్ పేపర్ రాయించుకునే పద్ధతిని ఆపాలని డిమాండ్ చేశారు. ఆందోళన అనంతరం పంచాయతీ రాజ్ కమిషనర్ రఘునందన్ రావును భాస్కర్ నేతృత్వంలోని పలువురు ప్రతినిధులు కలిసి వినతి పత్రం అందజేశారు. ఈ సందర్భంగా పలు డిమాండ్లపై ఆయన సానుకూలంగా స్పందించారు. రాష్ట్ర అధ్యక్షుడు గణపతి రెడ్డి, ప్రధాన కార్యదర్శి చాగంటి వెంకటయ్య పాల్గొన్నారు.
