హైదరాబాద్, వెలుగు: సీఎం రేవంత్రెడ్డితో పీసీసీ చీఫ్ మహేశ్ కుమార్ గౌడ్ భేటీ అయ్యారు. శుక్రవారం జూబ్లీహిల్స్లోని సీఎం నివాసంలో సుమారు గంటకుపైగా వారు చర్చించుకున్నారు. పంచాయతీ ఎన్నికల్లో జనరల్ స్థానాల్లో 80 శాతం బీసీలనే సర్పంచ్ అభ్యర్థులుగా బరిలో నిలపాలనే విషయంపై సీఎంతో పీసీసీ చీఫ్ చర్చించారు.
ఈ ఎన్నికల్లో మెజార్టీ సీట్లను కాంగ్రెస్ దక్కించుకునేందుకు అనుసరించాల్సిన వ్యూహంపైనా వారు చర్చించారు. నిజమైన కార్యకర్తలనే సర్పంచ్ అభ్యర్థులుగా, వార్డు మెంబర్లుగా బరిలో నిలిపి గెలిపించుకునేలా డీసీసీ చీఫ్లకు, ఎమ్మెల్యేలకు, ఎమ్మెల్యేలు లేనిచోట పార్టీ ఇన్చార్జీలకు, మంత్రులకు దిశా నిర్దేశం చేయాలని ఇద్దరు నేతలు నిర్ణయించారు.
మంత్రులతో ఎమ్మెల్యేలు, డీసీసీ అధ్యక్షులకు ఉన్న విబేధాలపై కూడా వీరి మధ్య చర్చ సాగింది. వచ్చే నెల 1 నుంచి ప్రారంభం కానున్న రెండేండ్ల కాంగ్రెస్ ప్రభుత్వ ప్రజాపాలన వారోత్సవాల విజయవంతంపై కూడా ఈ ఇద్దరు నేతలు చర్చించుకున్నారు. పార్టీ పరంగా వీటిని విజయవంతం చేయడంపై చేపట్టాల్సిన కార్యక్రమాలు ఈ ఇద్దరి మధ్య ప్రస్తావనకు వచ్చాయి.
పీసీసీ కార్యవర్గ సమావేశంపైనా చర్చ
వచ్చే నెల 2న నిర్వహించనున్న పీసీసీ కార్యవర్గ సమావేశంపై కూడా సీఎం రేవంత్, పీసీసీ చీఫ్ చర్చించారు. కొత్తగా నియమితులైన డీసీసీ అధ్యక్షులను ఈ సమావేశానికి ఆహ్వానించి.. పంచాయతీ ఎన్నికలపై దిశా నిర్దేశం చేయను న్నారు. సీఎం, పార్టీ ఇన్చార్జీ మీనాక్షి నటరాజన్ తో పాటు ఏఐసీసీ కార్యదర్శులు హాజరుకా నున్నారు.
ఆ సమావేశం ఎజెండాలో పెట్టాల్సి న అంశాలపై చర్చించుకున్నారు. ఇక డీసీసీ అధ్యక్షుల నియామకం ఇప్పటికీ పెండింగ్ లో ఉన్న రంగారెడ్డి, సంగారెడ్డి జిల్లాలపై ఈ భేటీలో చర్చ జరిగింది. పంచాయతీ ఎన్నికలు ఉండడంతో ఈ రెండు జిల్లాలకు వెంటనే డీసీసీ చీఫ్ లను నియమించే విషయంపై సీఎం, పీసీసీ చీఫ్ ఓ నిర్ణయానికి వచ్చినట్టు సమాచారం.
