గుండాల, వెలుగు : కాంగ్రెస్ పార్టీ మాయ మాటలు నమ్మొద్దని పినపాక బీఆర్ఎస్ అభ్యర్థి, ప్రభుత్వ విప్ ఎమ్మెల్యే రేగా కాంతారావు అన్నారు. శుక్రవారం ఆళ్లపల్లి మండలంలో ముమ్మురంగా ప్రచారం నిర్వహించారు. ఈ సందర్భంగా ఆయన మాట్లాడుతూ దేశంలో ఎక్కడ లేని విధంగా తెలంగాణను సీఎం కేసీఆర్అభివృద్ధి చేశారన్నారు. ఇప్పటికే గుండాల, ఆళ్లపల్లి మండలాల్లో 90 శాతం పనులు పూర్తయ్యాయని, మరోసారి బీఆర్ఎస్ను గెలిపిస్తే మిగతా పనులు కూడా పూర్తిచేస్తామని చెప్పారు.
పినపాక నియోజకవర్గానికి లక్షల కోట్ల నిధులు తెచ్చి అభివృద్ధి చేశామన్నారు. అనంతరం ఆళ్లపల్లి మండలం కాంగ్రెస్ పార్టీకి చెందిన 20 కుటుంబాలు బీఆర్ఎస్ లో చేరాయి. కార్యక్రమంలో బీఆర్ఎస్ సీనియర్ నాయకుడు భవాని శంకర్, ఎంపీపీ కొండ్రు మంజు భార్గవి, మండల అధ్యక్షులు పాయం, నరసింహారావు, కోఆపరేటివ్ చైర్మన్ గోగ్గేల రామయ్య తదితరులు పాల్గొన్నారు.
